Денес пишуваме за уште еден гејмерски лаптоп кој според спецификациите, треба да понуди перформанси на нивото на десктоп машините, а воедно има и многу кул име. Секако, не очекувајте дека ова решение ќе е преносно, но барем ќе можете да го ставите во скут – тоа и значи името “Laptop” нели…
Она што ги издвојува CLX Osiris 17 и 17x лаптопите од конкуренцијата е можноста за ставање на две графички картички во SLI конфигурација (кај 17x моделот). И тоа не било какви, туку супер моќните NVidia GeForce GTX 980, кои во ваква конфигурација, без проблем би можеле да ја пуштат секоја понова игра на Ultra HD резолуција.
Секако, за да нема апсолутно никакво сецкање, вграден е и Intel Skylake Core i7-6700K процесор, кој е отклучен, што значи дека може да му се направи “overclock”, односно зголемување на работниот такт. И овој процесор би требало мазно и без никакви проблеми да ги пушти сите понови игри на Ultra HD, односно 4K резолуција. Купувачот може да ги конфигурира овие лаптопи и со максимум 64 GB рам меморија.
Но и покрај тоа што компонентите дозволуваат играње на толку високи резолуции, CLX Osiris за жал има дисплеј со резолуција од само 1920х1080 пиксели, односно Full HD, која растегната на 17 инчи и не изгледа толку импресивно.
Секако, корисникот секогаш може да го приклучи овој лаптоп на екстерен дисплеј со повисока резолуција, но тогаш и се губи поентата на лаптоп дизајнот и за таква потреба, десктоп куќиште е веројатно подобро решение.
Сите овие компоненти генерираат и многу топлина – затоа и се ставаат во големи куќишта. Од CybertronPC ветуваат дека нема да има прегревање, но сето тоа секако треба да се испита и во пракса.
Покрај моќниот CLX Osiris, CybertronPC претстави и помал, 15,6 инчен гејмерски лаптоп наречен Anubis (и овој има верзија со 17 инчен дисплеј), кој има Core i7-6700HQ лаптоп процесор и GTX 970M лаптоп графичка карта. И најинтересно, овој лаптоп има верзија со Ultra HD дисплеј, иако неговите компоненти веројатно нема да имаат можност да ги пуштат сите игри на таква резолуција…
CybertronPC претстави и три десктоп машини – Ra, Horus и Scarab, кои донесуваат супер моќни компоненти, со можност за поврзување на четири NVidia GeForce GTX 980 графички кај најмоќниот Ra компјутер.
Извор: PCWorld, Maximum PC, Forbes
