Dell официјално ја претстави новата генерација на преносниот компјутер XPS 13, позиционирајќи го како најдостапниот модел во оваа серија досега. Наменет првенствено за студенти и млади професионалци, основниот модел е достапен за 699 долари, додека студентите можат да го добијат за 599 долари.
Со оваа ценовна стратегија, Dell директно му конкурира на MacBook Neo, истакнувајќи дека XPS 13 е за 100 долари поскап во двете категории, но нуди низа хардверски предности кои не се присутни кај конкурентот.
Компанијата нагласува шест клучни карактеристики кои го издвојуваат нивниот уред од MacBook Neo. Основниот модел на XPS 13 стандардно доаѓа со екран на допир, осветлена тастатура и поддршка за безжичниот стандард Wi-Fi 7, наспроти Wi-Fi 6E кај моделот на Apple.
Дополнително, преносниот компјутер на Dell вклучува побрза секундарна USB-C порта со пропусност од 10 GB/s, систем со четири звучници и можност за отклучување преку препознавање на лице со Windows Hello.
Од друга страна, MacBook Neo нуди само два звучника, побавна конекција и користи Touch ID за биометриска автентикација.
Екранот на новиот XPS 13 има дијагонала од 13 инчи со резолуција од 2560 на 1600 пиксели. Овој LCD панел нуди стапка на освежување од 30 до 120Hz и целосна покриеност на DCI-P3 спектарот на бои, нудејќи подобри перформанси од екранот на MacBook Neo кој е ограничен на 60Hz и sRGB спектар.
Во внатрешноста, основниот модел се напојува со новите процесори Intel Core Series 3, додека поскапите конфигурации ќе користат Intel Core Ultra Series 3. Системот вклучува 8GB работна меморија и 512GB простор за складирање податоци при лансирањето, со можност за конфигурација до 32GB меморија и 1TB простор. Верзија со 256GB простор се очекува подоцна.
Според производителот, ова е најтенкиот и најлесниот XPS лаптоп досега, со дебелина од 12,7 милиметри и тежина од 1 килограм во своето алуминиумско куќиште. Иако дебелината е иста како кај MacBook Neo, XPS 13 е полесен за повеќе од 200 грама.
Батеријата овозможува до 17 часа континуирано гледање на видео содржини. Основниот модел наскоро ќе биде достапен на пазарот во две бои, при што првично ќе се нуди светлата верзија, додека потемната варијанта ќе пристигне подоцна во текот на летото.
XPS серијата од Dell обично е во категоријата на премиум и доста скапи лаптоп компјутери, но од компанија изгледа решија да реагираат на популарноста која ја доби Apple со MacBook Neo и критиките за останатите производители.
„MacBook Neo на Apple е способна машина, а неговото пристигнување потврдува дека постои вистински апетит за премиум квалитет по достапни цени. Онаму каде што Dell се разликува е што според нас значи премиум во оваа ценовна категорија и што бевме спремни да изградиме за да го испорачаме.“ – истакнуваат од Dell.
