Apple официјално објави дека Тим Кук ќе ја напушти позицијата извршен директор, улога која ја извршуваше од 2011 година кога го наследи Стив Џобс. На негово место доаѓа Џон Тернус, досегашен виш потпретседател за хардверско инженерство.
Оваа транзиција претставува значајна промена во раководната структура на компанијата, иако Кук ќе остане активно вклучен преку неговата нова улога како извршен претседател на одборот на директори.
Со ова се потврдија досегашните неофицијални информации кои дури ја погодија и годината кога ќе дојде до оваа промена. Во сите овие објави, Тернус беше главниот кандидат за наследник на Кук, а тој ќе биде третиот директор на Apple по враќањето на Стив Џобс во компанијата и преземањето на водењето на истата во 1997.
Во својата нова позиција, Кук ќе се фокусира на долгорочната стратегија на компанијата, како и на односите со инвеститорите и владите ширум светот. Неговиот мандат како извршен директор го одбележа стабилен финансиски раст на Apple, проширување на портфолиото со нови категории на производи како паметни часовници и уреди за виртуелна и проширена реалност, паралелно со силен фокус на софтверските услуги и претплатите.
Изборот на Џон Тернус за нов извршен директор е логичен чекор за компанијата, со оглед на неговиот досегашен придонес во развојот на хардверот. Тој беше клучен во дизајнирањето на неколку генерации на iPhone, Mac и Apple Watch уреди, а го предводеше и претставувањето на iPad и AirPods уредите.
Под негово водство се очекува компанијата да продолжи со континуираниот развој на хардверскиот екосистем, вклучувајќи го и развојот на идни уреди на преклоп и подлабока интеграција на технологии базирани на вештачка интелигенција во самите оперативни системи.
Тим Кук се приклучи на Apple во 1998 година одговарајќи за глобалните операции, откако претходно изгради долгогодишна кариера во IBM и раководеше со секторот за материјали во Compaq. Од друга страна, Џон Тернус стана дел од компанијата во 2001 година во тимот за дизајн на производи, по неговото почетно искуство како машински инженер во Virtual Research Systems. Низ годините, Тернус континуирано напредуваше низ хиерархијата на одделот за хардверско инженерство, што на крајот резултираше со негово преземање на водечката позиција во овој клучен сектор пред да биде избран за нов извршен директор.
„Најголемата привилегија во мојот живот беше да бидам извршен директор на Apple и да ми се довери да водам толку извонредна компанија. Ја сакам Apple со сето мое битие и сум многу благодарен што имав можност да работам со тим од толку генијални, иновативни, креативни и длабоко грижливи луѓе кои беа непоколебливи во својата посветеност на збогатување на животите на нашите клиенти и создавање на најдобрите производи и услуги во светот“, рече Кук. „Џон Тернус има ум на инженер, душа на иноватор и срце да води со интегритет и чест. Тој е визионер чии придонеси за Apple во текот на 25 години се веќе пребројни за да се избројат и тој е без сомнение вистинската личност да ја води Apple во иднината. Не би можел да бидам посигурен во неговите способности и неговиот карактер и со нетрпение очекувам тесна соработка со него на оваа транзиција и во мојата нова улога како извршен претседател.“
„Длабоко сум благодарен за оваа можност да ја продолжам мисијата на Apple“, рече Тернус. „Откако ја поминав речиси целата моја кариера во Apple, имав среќа да работам под водство на Стив Џобс и да го имам Тим Кук како мој ментор. Беше привилегија да помогнам во обликувањето на производите и искуствата што толку многу го променија начинот на кој комуницираме со светот и едни со други. Исполнет сум со оптимизам за тоа што можеме да постигнеме во годините што доаѓаат и многу сум среќен што знам дека најталентираните луѓе на земјата се тука во Apple, решени да бидат дел од нешто поголемо од кој било од нас. Чест ми е што ја преземам оваа улога и ветувам дека ќе водам со вредностите и визијата што го дефинираат ова посебно место половина век.“
