Anthropic го претстави Claude Meetings, со кој Claude се приклучува на видео повиците како видлив учесник, го следи разговорот и почнува со работа уште додека трае состанокот. Засега е во бета верзија и постепено стига до Team и Enterprise корисниците.
Учесниците можат да го прашуваат на глас или преку разговорот на повикот, а во основните поставки Claude одговара во писмена форма. Може да ги користи и поврзаните алатки на корисниците, но само со нивна дозвола.
Claude прави документи, дигитални табли и други содржини што поканетите колеги ги уредуваат паралелно, а ги пишува и белешките и задачите за понатаму. Сето тоа, заедно со транскриптот, останува на посебна страница во claude.ai, а подоцна Claude може да се праша и за минатите состаноци на кои корисникот имал пристап.

Кога ќе се приклучи, Claude објавува известување во четот на повикот, а според Anthropic зачувува транскрипт, резиме и описи на екранот, но не и аудио. Кај Enterprise претплатата, во основните поставки Claude не влегува во повици на кои е поканет некој надвор од организацијата и го напушта повикот ако таков учесник се приклучи подоцна. Кај Team претплатата, според страницата за помош, ваквите повици се дозволени во основните поставки, а сопственикот на сметката може да ги исклучи.
Засега работи само со Google Meet, а другите платформи ќе стигнат „наскоро“. Кај Team претплатата е вклучен во основните поставки, а кај Enterprise го вклучува администраторот. Во бетата не е достапен за дел од организациите со посебна заштита на податоците, како оние без задржување на податоците или со HIPAA конфигурација.
Белешките, транскриптите и одговорите се бесплатни во бетата, освен кога одговорот користи поврзана алатка, што според страницата за помош се брои во потрошувачката на корисникот и може да донесе трошоци за организацијата. Документите и таблите направени на повик се бесплатни до 10 февруари 2027 година.
Google веќе нуди слично водење белешки со Gemini во самиот Meet, па Claude се обидува да се издвои со поврзаните алатки и со документите што ги прави за време на разговорот.
Claude е официјално достапен и кај нас, па фирмите со Team или Enterprise план ќе можат да го пробаат кога ќе стигне до нив.







































