Google го претстави Gemini 4 Hydrogen, третиот модел од серијата Gemini 4. Додека Argon и Carbon се наменети за долги и сложени задачи, Hydrogen е направен за брзо извршување на секојдневно програмирање и работа со агенти.
За разлика од претходните два, Hydrogen е достапен и на бесплатниот пакет во Google AI Studio и „API“-то. Во пребарувањето Google го пушта за сите корисници во светот, на сите јазици што ги поддржува AI Mode. Според страницата за помош, во апликацијата Gemini може да го изберат претплатниците на Google AI Plus, Pro и Ultra, а бесплатните корисници го добиваат само кога автоматскиот избор ќе процени дека барањето го бара, бидејќи повеќето одговори и понатаму ги дава Flash-Lite. Во Antigravity го добиваат компаниите, а од обичните корисници само претплатниците на AI Pro и Ultra.
Цената во „API“ е 1,50 долари за милион влезни „токени“ и 7,50 долари за милион излезни, иста за целиот контекст од милион „токени“. Тоа е помалку од Argon и Claude Sonnet 5.5, но повеќе од GPT-6.1 Terra. Дополнително, Gemini 3.8 Flash до крајот на годината чини двојно помалку, а од јануари ќе чини исто како Hydrogen.
Според Google, во споредба со 3.8 Flash новиот модел на основното ниво ги завршува задачите 2,5 пати побрзо, на Terminal-Bench 4.1 постигнува 57% наспроти 18,2% и „измислува“ над пет пати помалку. Моделот има и четири нивоа на размислување, од кои „xhigh“ е ново.
Во табелата на Google, Hydrogen е споредуван со Sonnet 5.5 и GPT-6.1 Terra и е прв на повеќето тестови. Сепак, Sonnet 5.5 е пред него на Terminal-Bench 4.1 (63,9% наспроти 57%), на управувањето со компјутер во OSWorld-2.1 (83,9% наспроти 77,6%) и на научниот Terminal-Bench-Science (59,9% наспроти 51,4%).
Според Google, на Artificial Analysis Intelligence Index Hydrogen на основното ниво high има 51 поен, еден повеќе од Argon, а на нивото xhigh 54. На графиконот на Google Sonnet 5.5 на највисокото ниво го достигнува истиот резултат, но е неколку пати поскап по задача, а на самата ранг-листа е малку пред Hydrogen со 55 поени.
Во Antigravity Google го воведува и Orchestrator, кој во иста сесија се префрла меѓу Carbon и Hydrogen. Според компанијата, на Terminal-Bench 4.0 речиси ја достигнува успешноста на Carbon, а во просек троши 24% помалку од лимитот и е 19% побрз.
Изгледа дека Google со Hydrogen, слично како OpenAI со Terra, не цели на најдобриот резултат, туку на цената и брзината.
