Warner Bros. вчера го објави последниот „трејлер“ за Dune: Part Three, третиот и завршен дел од адаптацијата на Дени Вилнев на научно-фантастичната сага на Френк Херберт. По мрачниот „тизер“ во март и „трејлерот“ во јули, овој пат студиото покажува многу повеќе акција, а Пол Атреидес (Тимоти Шаламе) веќе не е херојот од првите два филма. „По години борби, станав угнетувачот против кој Чани се заколна да се бори“, вели тој во „трејлерот“.
Првиот Dune од 2021 година заврши со поразот на куќата Атреидес, по што Пол и неговата мајка Лејди Џесика (Ребека Фергусон) се засолнија кај Фремените во пустината. Во Dune: Part Two од 2024 година Пол се наметна како водач, го победи шампионот на императорот и започна света војна против Големите куќи, а Чани (Зендаја) замина бидејќи одби да му се поклони.
Третиот дел ја следи втората книга од серијалот, „Месијата на Дина“. Според официјалниот опис на филмот, Пол сега е безмилосен император кој мора да се соочи со последиците од своето владеење, а старите сојузници се враќаат, се појавуваат нови закани и предавства. Тој е опседнат со визии за пропаст на империјата и со враќањето на неговата долго изгубена љубов, а се наоѓа во центарот на заговор во чие срце е Чани.
Покрај Шаламе, Зендаја и Фергусон, се враќаат и Флоренс Пју како принцезата Ирулан, Џош Бролин како Гарни Халек, Хавиер Бардем како Стилгар. Џејсон Момоа сега го игра Хајт, клон на загинатиот Данкан Ајдахо. Ања Тејлор-Џој, која имаше кратко појавување во вториот дел, сега ја игра сестрата на Пол, Алија.
Ново име е Роберт Патинсон како Скитејл, кој подготвува заговор за соборување на Пол. Синот на Џејсон Момоа, Накоа-Волф Момоа, ќе го игра Лето II, синот на Пол и Чани.
Dune: Part Three во светот почнува да се прикажува од 16 декември, а во САД и Канада на 18 декември, истиот ден кога и Avengers: Doomsday, па изгледа дека двата филма ќе си ја делат публиката во празничната сезона. Ова е и еден од првите големи филмови на Warner Bros. откако компанијата стана дел од Skydance.
