На отворањето на COMPUTEX 2026 и GTC Taipei, компанијата го најави своето прво „силициумско“ решение наменето за тенки лаптопи и компактни десктоп машини, во соработка со Microsoft и MediaTek. Спојот на CUDA, RTX и до 128GB обединета меморија изгледа како сериозен потег во правец на локалните вештачки агенти.
Со ова, Nvidia влегува во конкуренција со останатите, како Qualcomm, Intel, AMD и Apple, со понуда на сопствен чип за комерцијалните компјутери.
Џенсен Хуанг, основач и извршен директор на Nvidia, го отвори настанот со претставување на RTX Spark, чип кој компанијата го опишува како почеток на нова класа персонални компјутери.
Во срцето на платформата стои Blackwell RTX графички процесор со 6.144 „CUDA“ јадра и петта генерација „Tensor“ јадра со FP4 прецизност, поврзан преку NVLink-C2C со 20-јадрен Grace процесор. Во дизајнот на тој процесор учествуваше и MediaTek, што придонесе за енергетската ефикасност. RTX Spark нуди до еден „петафлоп“ пресметковна моќ за вештачка интелигенција и до 128GB обединета меморија.
Во пракса, тоа значи дека на еден тенок лаптоп може да се извршуваат јазични модели со 120 милијарди параметри и контекст до милион токени локално, да се рендерираат огромни 3D сцени од 90GB и да се обработува 12K „4:2:2“ видео.
Дополнително, платформата овозможува генерирање 4K видео со вештачка интелигенција и играње „AAA“ наслови на 1440p и над 100 слики во секунда со „ray tracing“, DLSS и Reflex, a NVIDIA вели дека графиката е приближно во класата на нивната RTX 5070 за лаптопи, но со многу помала потрошувачка.
Соработката со Microsoft е клучниот дел од приказната. Двете компании подготвуваат изворно Windows искуство за агенти што работат на самиот уред, со нови безбедносни механизми и со „NVIDIA OpenShell“ опкружување кое му дава на корисникот контрола врз тоа што агентите смеат, а што не смеат да прават.
Adobe пак ги преработува Photoshop и Premiere од темел за RTX Spark, со ветување за двојно побрза обработка на вештачка интелигенција и графика.
Покрај нив, над 100 софтверски и гејминг компании ја прифаќаат платформата, меѓу кои Blackmagic Design, Blender, ComfyUI, KRAFTON, NetEase, Remedy и XBOX.
Лаптопите со RTX Spark ќе бидат тенки и до 14 милиметри и лесни околу 1,4 килограми, во формати од 14 до 16 инчи, со „tandem OLED“ екрани и G-SYNC технологија.
Лаптопите, како и компактните десктоп машини се очекува дека ќе стигнат на есен од ASUS, Dell, HP, Lenovo, Microsoft Surface и MSI, а нешто подоцна и од Acer и GIGABYTE.
