Windows 11 наскоро ќе добие нова функционалност која ќе им овозможи на апликациите да ја проверуваат возраста на корисниците, без притоа да го дознаат нивниот точен датум на раѓање.
Microsoft развива нови системски алатки преку кои регистрираните програми ќе добиваат информација само за старосната група во која припаѓа корисникот, како и статус дали таа возраст е независно потврдена. Наместо да бараат лични податоци, платежни информации или документи за идентификација, апликациите ќе можат да се потпрат на податоците од самиот систем за да го ограничат пристапот до одредени содржини или да ги применат родителските контроли.
Според документацијата на компанијата, новиот механизам е дизајниран да ја зачува приватноста, делејќи ги корисниците во пет основни категории: под 10 години, од 10 до 12, од 13 до 15, од 16 до 17 и над 18 години. Овие податоци нема да бидат автоматски достапни за секој софтвер инсталиран на уредот. Платформата за дигитална безбедност прво ќе го проверува идентитетот на апликацијата што го бара податокот, а функционалноста ќе се користи исклучиво за социјални елементи, купувања во самите апликации и медиуми наменети за возрасни.
Овој потег на Microsoft е директен одговор на сè построгите регулативи за безбедност на децата на интернет кои се воведуваат во Обединетото Кралство, Европската Унија и Соединетите Американски Држави.
Наместо секоја апликација поединечно да развива сопствен систем за проверка на возраста, оперативниот систем ќе ја преземе улогата на посредник.
Слични системи за споделување на старосни групи веќе применуваат и други големи компании како Google и Apple, а новите алатки во Windows 11 се очекува да бидат активирани за програмерите до крајот на оваа година.
