Норвешката компанија Vivaldi го објави Vivaldi Enterprise, верзија на нивниот прелистувач наменета за компании, училишта и јавни институции. Таа е достапна за Windows, macOS и Linux, а организациите не плаќаат лиценца.
Vivaldi првпат ја најави верзијата за компании во септември, со Vivaldi 8.2, како техничка „верзија“. Тогаш компанијата напиша дека многу корисници имаат пречка да го користат и на работа, бидејќи треба да добијат дозвола од работодавачот.
Не станува збор за посебно издание. Според Vivaldi, организациите го добиваат истиот прелистувач како и сите други, со секое ажурирање на денот кога ќе излезе. Како што пишува на страницата за помош, IT тимовите можат да го управуваат преку правила („policies“). За Windows има ADMX шаблони за Active Directory, Microsoft Intune, FleetDM и слични MDM алатки, а за macOS и Linux шаблони во PLIST и JSON формат.
Преку правилата централно се поставуваат додатоците, омилените страни, пребарувачите, почетната страница, синхронизацијата, VPN услугата и поставките за приватност. Покрај повеќето правила од Chromium, во правила се претворени и некои поставки специфични за Vivaldi, како Mail и VPN. Меѓу датотеките за Windows е наведен и MSIX инсталер наменет за управувана инсталација, кој според Vivaldi содржи обична верзија на прелистувачот и се ажурира преку Windows Update.
Vivaldi засега нема планови за сопствена конзола за управување. Според компанијата, таквите конзоли обично ја бележат историјата на прелистување, што е спротивно на нејзините вредности. Тоа е спротивен пристап од Firefox Enterprise, кој Mozilla го претстави во октомври со конзола што организациите ја стартуваат на сопствени сервери.
Дополнително, Vivaldi истакнува дека не ги следи вработените, дека во прелистувачот нема „AI“ асистенти и агенти и дека податоците не се користат за тренирање јазичните модели. Компанијата минатата година соопшти дека нема да додава четбот, резимеа и предлози базирани на големи јазични модели сè додека не постојат посигурни начини за тоа. „Без вградена AI“ сега е една од точките со кои го претставува Enterprise, покрај „без следење“, „без профилирање“ и „без такса за лиценца“.
Самиот прелистувач е бесплатен, но поддршката не е секогаш. Бесплатната поддршка е преку заедницата на форумот, а има и три платени нивоа чија цена зависи од бројот на корисници. Цените не се објавени.
За преземање, организацијата го внесува своето правно име и е-пошта и го прифаќа договорот за лиценца. Ни на страницата ни во договорот за лиценца нема ограничувања по земји, што значи дека Vivaldi Enterprise треба да може да се користи и кај нас.
