Atlas е изменета верзија од Windows 10 која треба да им овозможи на гејмерите подобро искуство кога ги играат игрите. Од друга страна, Atlas се промовира и како одлична алтернатива на Windows 10 за корисниците кои имаат постари и веќе забавени компјутери.
Причината поради која овој оперативен систем е погоден за овие две ситуации е тргањето на голем дел од функциите, процесите и сервисите со кои стандардно доаѓа Windows 10. Со тоа се добива намалување на просторот на дискот кој е зафатен од системот, помала потрошувачка на RAM, помало оптоварување на процесорот, помала латенција при користење на компјутерот и слично. Сето ова треба да овозможи подобро искористување на компутерот за играњето на игрите, а тие наводно ќе добијат и поголем „framerate“.
Развивачите на Atlas истакнуваат дека бројот на процеси е намален од 145 на само 35, што е огромна разлика. RAM меморијата која ја користи системот исто така е намалена од 1,5GB на само 600MB.
Може да се претпостави зошто покрај за играње игри, овој систем се промовира и како одличен за постарите компјутери кои немаат доволно ресурси да ги користат модерните верзии од Windows .
Со цел подобрување на перформансите, сепак тргнати се дел од функциите кои се поврзани со безбедноста, а и самите развивачи го истакнуваат тоа. Тргнати се можноста за надградба на системот, користењето на TPM чип, Bitlocker, Windows Defender и слично. Се истакнува дека ако некоја функција влијае на перформансите, таа ќе биде тргната, па корисниците имаат поголем ризик од познатите Spectre и Meltdown малициозни софтвери.
Во продолжение можете да го погледнете и видеото во кое се тестираат тврдењата за подобрени перформанси со Atlas, па во комбинација со безбедносните ризици, дали вреди да се користи.
