Корисниците на паметни телефони добиваат ново решение за менаџирање со своите картички за лојалност преку апликацијата „Клуб Картички“, развиена од македонскиот издавач NetMkd.
Софтверот е дизајниран да го замени физичкото носење на пластични картички при пазарувањето во супермаркетите и другите продажни објекти. Процесот на внесување е едноставен, при што корисниците можат да го скенираат баркодот од физичката картичка преку камерата на уредот или рачно да ги внесат броевите доколку картичката е оштетена.
При плаќањето на каса, доволно е да се отвори дигиталната верзија на екранот за да биде скенирана од страна на вработените во објектот.
„Клуб Картички“ нуди организација на картичките преку повеќе стандардни категории кои опфаќаат маркети, аптеки, бензински пумпи, ресторани, бутици, спортски продавници и останато, а предвидена е и опција за креирање на сопствени категории.
За полесно препознавање, корисниците можат да го приспособат изгледот на секоја картичка преку избор на специфична боја или икона. Функционалноста е надополнета со систем за брзо пребарување низ листата, како и со автоматско зголемување на осветленоста на екранот на максимум при отворање на картичката, што го олеснува процесот на скенирање на терминалите.
Една од главните карактеристики на софтверот е строгиот пристап кон приватноста и безбедноста на податоците. Апликацијата функционира целосно без интернет конекција и не содржи реклами. Од тимот зад развојот нагласуваат дека не се применува никакво следење на корисниците, ниту пак се користат алатки за аналитика, пренос на податоци и креирање на кориснички сметки. Сите информации се чуваат исклучиво на меморијата на самиот телефон, а единствената дозвола која се бара од оперативниот систем е пристапот до камерата кој е неопходен само за потребите на скенирањето.
Апликацијата е достапна преку Google Play, комплетно е бесплатна за користење и нуди целосна локализација на македонски јазик.
