OpenAI ги претстави Dots, нов тип автономни агенти со вештачка интелигенција кои работат за корисникот и кога тој не е пред компјутерот. Компанијата ги опишува како „исклучително способни агенти кои се секогаш вклучени и се направени да се справат со сè“, што е прилично амбициозно тврдење за производ кој штотуку излегува.
Според OpenAI, секој агент, односно „dot“, работи со GPT-6 Astra, има свој компјутер во „облакот“ и може да работи на зададените цели 24 часа на ден. Компанијата тврди и дека агентот со текот на времето учи од повратните информации и ги научува навиките и очекувањата на корисникот.
Преку додатоци, Dots можат да се поврзат со повеќе од 4.000 апликации. Со нив се комуницира преку ChatGPT, Slack и Teams, а OpenAI најавува дека наскоро ќе може да им се праќаат и SMS пораки од телефон. Дополнително, со агентот може да се работи заедно и преку гласовен повик.
Бидејќи агентот има пристап до апликации и сметки, OpenAI посветува доста простор на безбедноста. Компјутерот во „облакот“ е одвоен од компјутерот на корисникот, освен ако тој сам не одлучи да ги поврзе, а при најава на поддржани веб страници агентот може да користи зачувани лозинки без моделот да ги види. Таканаречено „proactive research“, односно самостојното истражување, има само пристап за читање во апликациите, а чувствителните дејства поминуваат низ автоматска проверка.
Корисникот може да постави свои правила за одобрување или блокирање на одредени дејства, а сета работа во позадина се следи во посебен преглед на активностите. Одредени чувствителни задачи, како менување лозинка, според OpenAI секогаш остануваат кај корисникот.
За компаниите OpenAI подготвува и т.н. „specialist dots“, агенти со точно одредена улога, службени акредитиви и пристап до системите на организацијата. Тие се засноваат на внатрешното тестирање во OpenAI, во набавки, обработка на фактури, маркетинг преку е-пошта, корисничка поддршка и договори, а кај другите компании засега се само пилот-проекти. OpenAI дополнително соопшти дека работи со Microsoft овие агенти да се поврзат со контролите за управување и безбедност во Agent 365.
Dots од вчера постепено стигнуваат во ChatGPT, а според страницата за достапност Pro корисниците ги добиваат насекаде освен во Европскиот економски простор, Швајцарија и Велика Британија. Business Premium корисниците ги добиваат во сите земји каде работи ChatGPT, а Enterprise, Edu и Healthcare можат да ја пробаат бета верзијата ако ја вклучи администраторот.
