Apple објави нови промени во своите деловни услови за апликациите на територијата на Европската Унија, кои доаѓаат како резултат на соработката со Европската комисија. Со овие чекори, компанијата ги решава досегашните несогласувања околу алтернативната дистрибуција и го поедноставува процесот со тоа што сите програмери кои нудат апликации во ЕУ преминуваат на еден унифициран модел. Новите услови можат да се прифатат веднаш, а официјално ќе почнат да се применуваат од први октомври оваа година.
Според новиот модел, претходната такса за основна технологија која се наплаќаше по инсталација е заменета со провизија за основна технологија, која изнесува 5 отсто на дигиталните трансакции за апликации дистрибуирани надвор од App Store.
За апликациите во App Store кои го користат системот за плаќање на Apple, провизијата ќе изнесува 26 отсто, односно 15 отсто за помалите програмери. Оние што ќе користат алтернативни системи за плаќање внатре во апликацијата ќе плаќаат 20 отсто, додека апликациите што пренасочуваат кон веб страници за плаќање ќе подлежат на провизија од 15 отсто, со дополнително намалување на 10 отсто за програмерите кои се дел од програмите за мали бизниси.
За првпат во Европската Унија, програмерите добиваат можност да го нудат системот за плаќање на Apple паралелно со алтернативни опции за наплата. За да се обезбеди конзистентно корисничко искуство, програмерите ќе мора да ги изберат посакуваните методи за наплата и истите да ги задржат најмалку дванаесет месеци.
Apple исто така ги прошири критериумите за субјектите кои можат да отвораат алтернативни продавници за апликации или да дистрибуираат софтвер преку веб, вклучувајќи јавни компании, субјекти со финансиска ревизија, како и владини, образовни и непрофитни институции.
Во насока на заштита на корисниците, особено на најмладите, воведени се дополнителни безбедносни мерки. Апликациите наменети за деца нема да смеат да содржат линкови до надворешни веб страници за плаќање. За корисниците помлади од 18 години, сите апликации кои користат алтернативни плаќања ќе бараат задолжително одобрување од родител, додека за децата под 13 години целосно се забранува пренасочувањето кон надворешни сајтови за трансакции.
Сите апликации кои се дистрибуираат преку веб и натаму ќе мора да поминат низ основниот безбедносен преглед на Apple за да се спречи инсталација на софтвер од „злонамерни актери“.
