Apple во јануари ја купила малата компанија Patchflyer, што го открија нови документи за купопродажби објавени од Европската Унија. Patchflyer беше во сопственост на Џонатан Очман, креаторот на Color.io, веб базирана алатка за обработка на боја популарна меѓу фотографите и филмските работници.
Со купувањето, Apple го ангажирала и самиот Очман. Тој уште во ноември минатата година го најави затворањето на Color.io и тогаш напиша дека по повеќе од 10 години работа сам, дошол до точка кога треба да расте на начин што не е возможен самостојно.
Color.io беше познат како моќна, но едноставна алатка за додавање филмска боја и текстура на слики. Користеше сопствен систем за управување со боја со сопствени модели и нудеше богата библиотека алатки за манипулација со боја. Очман пред тоа ги дизајнираше и популарните VisionColor филтри за боја, што кај корисниците беа речиси стандард.
Платформата официјално престана со работа на 31 декември 2025, со само околу пет недели претходна најава за нејзините над 200.000 корисници, брз и нагол крај што многумина го забележаа како необичен. Сега е јасно зошто беше така.
Со Очман веќе вработен во Apple, можностите од Color.io би можеле да се појават во софтверот на Apple во иднина. Неговата експертиза и алатките од Color.io логично би се вклопиле во Final Cut Pro или Pixelmator Pro, што претставува сосема разбирлива насока за компанија која сè повеќе се фокусира на професионалните корисници.
