Конкурентот на Netflix од Amazon, наречен Prime Video, наскоро би можел да добие ново име. Неофицијалните извори истакнуваат дека тоа име треба да биде Amazon TV, а во игра биле уште неколку други имиња.
Не е познато дали промената на името, доколку информацијата испадне точна, е планирана за целиот свет или само во одредени земји како на пример САД. Не е ретко да постои поделба на сервисите во САД и во остатокот од светот.
Според информациите, Amazon имаат направено мала анкета во која биле предложени и имиња како Amazon Stream, Amazon+, Amazon Streaming и Amazon Premiere. Покрај имињата, прикажано било и ново лого, како и изгледот на променетата апликација.
Инаку, Prime Video доби редизајн на апликацијата изминатите години, нешто што ја доближи до конкурентите кои едно време беа доста понапред, со корисничкиот интерфејс, но и со перформансите.
За Prime Video, барем во нашата земја, не може да се каже дека го нуди еден од подобрите избори на содржина, но сепак достапни се доволно голем број на ексклузивни филмови и серии, како на пример одличната Star Trek: Picard која заврши со последната епизода од третата сезона минатата недела.
