Обидите Linux да стане оперативен систем за телефони не се нови. Canonical тоа го пробуваше со Ubuntu телефоните пред повеќе од десет години, а финската Jolla минатата година се врати со нов Jolla Phone. Во последниве недели се појавија уште три проекти, што отвори прашање дали 2027 ќе биде годината на Linux телефоните.
Најактивен изгледа Omarchy Mobile, кој ја пренесува Omarchy, популарната верзија на Arch Linux од Дејвид Хајнемајер Хансон, на телефони без Android под него. Проектот е на GitHub сметката на Дерек Рос, го развива заедницата и не е официјален производ на Omarchy или Basecamp. Првата јавна објава е од 12 октомври, уште под името Omandroid.
Главен уред е Pixel 7 Pro, на кој веќе работат екранот на 120 Hz, Wi-Fi, Bluetooth, сите четири камери, GPS, NFC и читачот на отпечатоци. Повиците, пораките и мобилниот интернет сепак сè уште не работат, а тестот со SIM картичка е следниот чекор. Инсталацијата пишува само во вториот „boot slot“, па оригиналниот Android останува како резерва.
Luma има поголема амбиција: еден систем за компјутер, таблет и телефон. Според It’s FOSS, се базира на Fedora, има сопствен десктоп Prairie, изведен од GNOME, а основачот Ник го развива со мала група луѓе, кои според блогот на Luma се волонтери.
Luma е во алфа верзија од 7 октомври, а Luma Mobile Alpha 1 засега може да се преземе само за Fairphone 6 и Unihertz Titan 2 Elite. Android апликациите би работеле преку Waydroid, а за повиците на овие уреди не е наведено ништо.
Најмалку конкретен е ZubrOS, зад кој стои Јуриј Зубаровски, кој ја води листата на чекање. Целта е систем околу „AI“ агент и сопствен „облак“, но засега тоа е само насока. Системот работи на еден Nothing Phone (1), со потврдено подигнување, екран, допир, Wi-Fi, камери и полнење, додека повиците се сè уште во развој.
Јавна инсталација и линк до изворен код нема, а поддршка за Android апликации не се ветува.
Сите три во голема мера се потпираат на вештачка интелигенција, во развојот или во самиот систем. Ниту еден не е подготвен за секојдневна употреба, а кај Omarchy Mobile и ZubrOS не работат ни повиците.
Тоа значи дека прашањето дали 2027 ќе биде годината на Linux телефоните засега останува отворено.
