Samsung започнува со глобална имплементација на следната генерација на својот формат за висок динамички опсег, наречен HDR10+ Advanced. Овој чекор е направен со цел технологијата да биде достапна за корисниците пред конкурентниот стандард Dolby Vision 2.
Иако компанијата Dolby претходно овој месец започна со дистрибуција на софтверското ажурирање за одредени телевизори на Hisense од 2026 година, за тој формат сè уште нема достапна содржина. Поради тоа, HDR10+ Advanced ќе биде првиот формат од новата генерација кој гледачите практично ќе можат да го користат во своите домови.
Новиот стандард нуди повеќе од само унапредувања на високиот динамички опсег. Технологијата вклучува напредно „скалирање“ на осветленоста и боите, како и адаптивно измазнување на движењата на сликата.
Оваа верзија, која е различна од претходната HDR10+ Adaptive, ќе биде достапна глобално во текот на овој месец за сопствениците на телевизори на Samsung од 2026 година при користење на платформата Amazon Prime Video.
Претставниците на Samsung и Amazon истакнаа дека оваа соработка претставува значаен чекор кон подобрување на визуелното искуство за домашните системи за забава. Amazon засега нема објавено кои конкретни филмови и серии ќе бидат понудени со новата технологија, но компанијата беше главен партнер и при првичното лансирање на HDR10+ во декември 2017 година.
Во споредба со претходните верзии на форматот, HDR10+ Advanced се истакнува со три клучни развојни промени. Првата е зголемената вкупна осветленост, која користи проширени статистички „метаподатоци“ за максимално искористување на капацитетите на денешните премиум телевизори. Вториот новитет е мапирањето на тонови преку вештачка интелигенција, процес кој служи за зачувување на визуелните детали во потемните сцени. Третата карактеристика е интелигентното измазнување на движењата, кое користи „метаподатоци“ за секоја сцена поединечно за да овозможи динамично прилагодување кај поддржаните екрани, задржувајќи го филмското чувство со природно движење на сликата.
Системот за HDR10+ Advanced воведува и дополнителни прилагодувања кои се наменети специфично за видео игри и спортски содржини. Овие нови карактеристики за подобрување на сликата нема да бидат активни доколку на телевизорот е вклучен режимот наменет за „филмови“ (Filmmaker Mode).
Во овој момент, ниту еден друг стриминг сервис нема најавено поддршка за новиот стандард на Samsung, а воедно нема ниту индикации дека HDR10+ Advanced или Dolby Vision 2 ќе бидат поддржани за репродукција преку UHD Blu-ray дисковите.
