Семос Едукација започна стратешка соработка со Гересхајмер, дел од глобалната германска групација специјализирана за производство на медицински производи од стакло и пластика, со цел воведување на вештачка интелигенција (AI) во деловните процеси на компанијата. Партнерството е насочено кон идентификување на можностите за автоматизација, оптимизација на работењето и развој на дигиталните компетенции на вработените, како клучни предуслови за успешна дигитална трансформација.
За сè поголем број компании, прашањето повеќе не е дали ќе користат вештачка интелигенција, туку како да ја применат на начин што ќе донесе мерливи резултати. Наместо AI да биде само нова технологија, организациите бараат конкретни решенија што ќе заштедат време, ќе ги поедностават работните процеси и ќе им овозможат на вработените да се фокусираат на активности што создаваат поголема вредност.
Во рамки на соработката, Семос Едукација спроведе анализа на процесите со цел да ги идентификува областите во кои вештачката интелигенција може да има најголемо влијание. Посебен фокус е ставен на секторите за човечки ресурси и финансии, каде AI има потенцијал да ја намали административната работа, да ја подобри организацијата на процесите и да обезбеди побрз пристап до информации потребни за носење деловни одлуки.
Покрај технолошката анализа, значаен дел од процесот претставува и развојот на дигиталните компетенции на вработените. Затоа, Семос Едукација ќе подготви насочени програми за обука, со цел новите технологии да бидат применети практично, ефикасно и во согласност со реалните потреби на компанијата.
„Дигиталната трансформација е процес во кој континуирано инвестираме, а вештачката интелигенција ја гледаме како логичен следен чекор во неговиот развој. Нашата цел е да ги унапредиме процесите и да им обезбедиме на нашите тимови современи алатки што ќе им помогнат да работат поефикасно. Соработката со Семос Едукација ни овозможува овој процес да го градиме систематски, врз основа на реалните потреби на компанијата и со јасна визија за понатамошен развој“, велат од Гересхајмер.
За Семос Едукација, ова партнерство е уште една потврда дека вештачката интелигенција веќе не е тема резервирана за ИТ секторот. Денес таа има практична примена во производството, финансиското управување, човечките ресурси и голем број други деловни функции, каде придонесува за поголема ефикасност, подобра организација и поконкурентно работење.
Преку вакви партнерства, Семос Едукација продолжува да ги поддржува компаниите во нивната дигитална трансформација, поврзувајќи ги современите технологии со конкретните потреби на бизнисот и создавајќи услови за одржлив раст и долгорочен развој.
