Sony официјално имплементираше нова политика против вознемирување од страна на корисниците, која доаѓа како одговор на бурните реакции по најавата за целосно укинување на физичките дискови за PlayStation игрите до јануари 2028 година.
Во објава од први септември, компанијата ги наведе забранетите однесувања со цел да го заштити достоинството и безбедноста на своите вработени.
Според новите правила, компанијата предупредува дека може да ја ограничи или целосно да ја укине корисничката поддршка доколку се забележат неприфатливи однесувања. Дел од забранетите дејствија вклучуваат постојани и неразумни барања за компензација, навредлив јазик, закани, дискриминаторско однесување, како и физичко доаѓање во просториите на компанијата без дозвола или прекумерно барање на извинувања.
Sony посочија дека ќе заземат цврст став против ваквите постапки и доколку е потребно, ќе соработуваат со полицијата и адвокатите за покренување на кривични и правни мерки.
Ваквиот потег доаѓа по интензивните критики од гејмерската заедница во врска со планот за прекин на производството на физички медиуми. Корисниците изразуваат незадоволство бидејќи сметаат дека укинувањето на дисковите значи крај на вистинската сопственост над игрите, претворајќи ги дигиталните купувања во форма на изнајмување каде што компанијата има моќ да го ограничи пристапот по своја желба.
Како одраз на ова незадоволство, онлајн петицијата за запирање на оваа транзиција, отворена само шест дена по првичната најава во јули, веќе се приближува кон бројката од 400.000 потписи.
И покрај масовните реакции и неколкуте тековни колективни тужби, Sony не планира да се откаже од својата стратегија. Една од тужбите се фокусира на тврдењето дека компанијата ги доведува потрошувачите во заблуда преку користење на копчето за купување дигитални игри, без јасно да нагласи дека се работи за привремена лиценца која може да биде отповикана.
Од компанијата одговорија со барање за вонсудска арбитража, истакнувајќи дека разумните потрошувачи не би требало да бидат доведени во заблуда дека дигиталните игри се нивна трајна сопственост. Sony останува на ставот дека внимателно ќе продолжи со својата одлука за иднината без дискови и покрај силното спротивставување од страна на играчите.
