Qualcomm објави рана верзија за програмери на Linux за лаптопите со процесорите Snapdragon X2. Таа е наменета за програмерите на кернелот, одржувачите на дистрибуции и инженерите за хардвер, а не за обичните корисници.
Верзијата што ќе може едноставно да се инсталира ќе дојде подоцна, кога дистрибуциите ќе ги преземат промените. Засега основа е Debian 13 „Trixie“ со посебно прилагоден кернел.
Најважното е што Qualcomm не прави посебна верзија на Linux, туку поддршката ја внесува директно во главниот Linux кернел. Тоа значи дека во иднина секоја дистрибуција со доволно нов кернел ќе може да работи на овие лаптопи, без посебни закрпи.
Прв приоритет се драјверите за графиката, преку отворените Mesa драјвери Freedreno, Turnip и Rusticl, и за процесорот за вештачка интелигенција Hexagon, за да можат AI моделите да работат локално. Според Qualcomm, вистински лаптопи со Snapdragon X2 веќе стартуваат Linux, а компанијата тоа го демонстрира на овогодинешниот Snapdragon Summit.
Qualcomm очекува подготвеноста за производство да ја заврши до крајот на ноември, а внесувањето на промените во кернелот ќе продолжи и потоа, за сертификација и за лаптопи со Linux од производителите. Според VideoCardz, основната поддршка за Debian се очекува до крајот на годината, а сертификацијата за Ubuntu во првата половина на 2027 година.
Поддршката се однесува само на лаптопите со Snapdragon X2, без десктоп компјутерите, претходната генерација Snapdragon X и развојните плочки. Дополнително, нивото на поддршка се разликува според дизајнот на лаптопот и верзијата на процесорот, па ова не значи дека секој лаптоп со X2 веќе целосно работи со Linux.
Програмерите можат веднаш да почнат да тестираат, со упатствата и GitHub репозиториумите на Qualcomm за изградба на Debian систем за овие лаптопи.
Ова е значителна промена во однос на минатата година, кога Qualcomm препорачуваше Linux на Snapdragon X да се користи преку WSL2 во Windows 11. Во ноември 2025 година, производителот на Linux лаптопи TUXEDO го прекина развојот на својот лаптоп со Snapdragon X Elite поради проблеми со батеријата и поддршката под Linux.
Ако Qualcomm го исполни планот, лаптопите со Snapdragon конечно ќе станат вистинска опција и за корисниците на Linux, а не само за оние на Windows.
