Еван Блас, познат по неговиот X профил @evleaks, преку кој со години прв ги откриваше деталите за претстојните паметни телефони, најави дека планира да се повлече од оваа активност.
Во својата најнова објава, тој сподели намера целосно да го згасне профилот кој активно го управува уште од 2012 година, посочувајќи дека сака да се посвети на своето здравје и да најде постабилен извор на финансии.
Како главна причина за оваа одлука, Блас наведе дека континуираното следење и објавување на информации станало одвлекување на вниманието кое повеќе не му е продуктивно. Тој отворено сподели дека се соочува со тешкотии да ги покрие трошоците за неопходните лекови, поради што му е потребен сигурен и редовен приход кој овој тип на работа не му го овозможува.
Со оглед на тоа што се приближува кон својата педесетта година, тој смета дека е време за промена на приоритетите, додавајќи дека сепак ќе задржи лежерно присуство на својот Instagram профил.
Интересно е да се потсетиме дека ова не е првпат Blass да најави свое повлекување од сцената на технолошките протекувања на информации. Во август 2014 година, тој објави речиси идентична порака дека престанува со работата на @evleaks, наведувајќи слични причини поврзани со неможноста за соодветна монетизација на профилот и здравствени проблеми.
И покрај таа најава, тој по краток период постепено се врати и продолжи да биде еден од најсигурните извори во индустријата. Поради оваа историја, во технолошката заедница веќе постојат реални очекувања и шанси дека тој повторно би можел да се врати на објавувањето откако ќе ја стабилизира својата финансиска и здравствена состојба, иако засега останува на ставот дека профилот на X ќе биде избришан.
