Делегација на Saint-Gobain, една од водечките светски компании во областа на модерното и одржливо градење, го посети Експо 2027 Плејграунд за време на својот престој во Белград по повод големото меѓународно студентско натпреварување Saint-Gobain Architecture Student Contest 2026.
Делегацијата ја сочинуваа претставници на Извршниот одбор на компанијата Saint-Gobain, како и студенти по архитектура кои учествуваат на овогодишното меѓународно финале на натпреварот во Белград. За време на посетата ги пречека Душан Боровчанин, кој ги претстави клучните аспекти на проектот на специјализираната изложба Експо 2027 Белград.
Претставниците на компанијата и студентите беа запознаени со мастер-планот, урбаната трансформација на локацијата во Сурчин, планираната динамика на развојот на проектот, како и со долгорочниот потенцијал на просторот по завршувањето на изложбата.
Студентката Анастасија Мојсовска од Универзитет „Св. Кирил и Методиј“ истакна дека учеството на овој меѓународен натпревар е исклучителна можност за младите архитекти да ги претстават своите идеи и да разменат искуства со колеги од целиот свет.
„Како студенти, инспирирани сме од визијата на Експо 2027 и неговото мото „Играј за човештвото“. Гледаме силна поврзаност меѓу овогодишната задача на натпреварот, која е фокусирана на рекреација и спорт, и концептот на архитектурата како двигател на човечката интеракција, благосостојбата и општествената кохезија“, изјави Мојсовска.
Зборувајќи за значењето на посетата, Боровчанин истакна дека станува збор за компанија која повеќе од три века ја обликува современата архитектура и градежништво, како и дека Saint-Gobain е еден од добавувачите на материјали за комплексот Експо 2027 Белград.
„Особено нѐ радува што меѓународниот студентски архитектонски натпревар, кој собра повеќе од 1.400 студенти по архитектура од целиот свет, оваа година се одржува токму во Белград. Денес разговаравме и за можноста на студентите чии трудови ќе бидат наградени да им овозможиме да се претстават за време на Експо 2027. Тоа би била единствена можност своите идеи и проекти да ги претстават пред повеќе од 140 меѓународни учесници и голем број посетители од целиот свет“, рече Боровчанин.
Посетата на групацијата Saint-Gobain беше реализирана во рамките на нивниот престој во Белград по повод натпреварот Saint-Gobain Architecture Student Contest 2026, еден од значајните меѓународни формати за студенти по архитектура, кој оваа година собира претставници од 34 земји.
Посебното значење на оваа програма се огледа во фактот што иницијативата за натпреварот е започната токму во Србија во 2004 година, под името Isover MultiComfort Student Contest. Веќе следната година натпреварот добил меѓународен карактер, а денес претставува глобална платформа што ги поврзува младите архитекти, универзитетите и експертите во областа на одржливото градење.
За значењето на студентскиот натпревар и соработката со проектот Експо 2027 говореше и Дејвид Моло, кој оцени дека враќањето на овој престижен натпревар во Белград претставува важен поттик за развојот на новите генерации архитекти и размена на идеи за одржлива, отпорна и инклузивна архитектура.
„Особено ни е драго што ова меѓународно студентско архитектонско натпреварување по повеќе од дваесет години повторно се одржува во Белград. Станува збор за исклучителен натпревар преку кој заедно со студентите развиваме поодржлива, поотпорна и поинклузивна архитектура.
Истовремено, горди сме што учествуваме во реализацијата на Експо 2027 Белград. Веќе започнавме со испорака на одредени материјали за да го направиме Експо 2027 поодржлив и поудобен за учесниците. Многу сум импресиониран од овој проект и горд што можеме да дадеме толку значаен придонес, а навистина со нетрпение очекувам следната година да го видам во живо“, рече Моло.
Експо 2027 Белград, кој ќе се одржи од 15 мај до 15 август 2027 година, во текот на 93 дена ќе собере земји, меѓународни организации, компании и посетители од целиот свет преку програми посветени на иновации, спорт, музика, култура и меѓународна размена.
