Fedora Project ја објави Fedora Linux 45, новата верзија на дистрибуцијата која последниве месеци сè почесто се препорачува како прв избор за Linux. Изданието стигна на 3 ноември, две недели подоцна од планираното, бидејќи датумот двапати беше одложуван поради грешки пронајдени во последните тестирања. Бета верзијата излезе во средината на септември.
Од Fedora 42 при пад на јадрото („kernel panic“) на екранот се појавува QR код со технички запис за грешката, кој за повеќето корисници е неразбирлив. Со новиот веб-интерфејс скенирањето на кодот со телефон води до страница на Fedora која објаснува што се случило и нуди пријава на грешката во Bugzilla со веќе пополнети податоци за системот.
Текстуалната конзола што се отвора со Ctrl+Alt+F3 сега ја исцртува kmscon, програма што работи надвор од јадрото, наместо досегашниот „fbcon“. Според Fedora, тоа значи „скролање“, основна поддршка за глушец, фонтови што може да се зголемуваат и ист распоред на тастатурата како во графичкиот десктоп, а пад на конзолата повеќе не го руши целиот систем.
Ако kmscon не се стартува, системот автоматски се враќа на стариот начин. Сепак, администраторите треба да ги проверат скриптите што се потпираат на имињата на терминалите, бидејќи тие сега се „/dev/pts/0“ наместо „/dev/tty1“, а графичките програми од конзолата се стартуваат преку посебна команда.
Fedora Workstation доаѓа со GNOME 51 и нов сервис за чување лозинки, oo7, кој ја заменува GNOME Keyring. KDE верзијата пак ги носи новостите од Plasma 6.7 и 6.8, меѓу кои посебни виртуелни работни површини за секој монитор и вратената тема Oxygen.
Fedora како една од најголемите новости ја издвојува поддршката за Stratis во „инсталаторот“, систем за управување со дискови кој овозможува здружување на повеќе дискови, снимки на состојбата („snapshots“) и шифрирање. Системот работи со Linux 7.2 јадрото, иако Ubuntu 26.10 пред три недели стигна со 7.3.
Програмерите добиваат Podman 6, нова главна верзија на алатката за „контејнери“ која според Fedora носи промени што ги кршат постоечките команди и „API“, па вреди да се провери пред надградба.
Дополнително, додатоците за NetworkManager за vpnc и Fortinet SSL VPN се отстранети, а постојните врски треба да се префрлат на openconnect или libreswan.
Fedora 45 е бесплатна за преземање од официјалната страница, а постојните корисници можат да надградат преку GNOME Software или командата „dnf system-upgrade“.
На новата верзија веќе е базиран и Bazzite 45.
