NASA соопшти дека Voyager 1 повторно комуницира со тимот на Земјата, откако на 18 и 19 октомври леталото не се „јави“ на две закажани проверки. Сигналот повторно се појави на 20 октомври, а проблемот се решил сам од себе, пред инженерите да испратат команди за да го решат проблемот.
Антените на Deep Space Network не забележаа радиосигнал од леталото во два обиди, во растојание од 24 часа. Од 20 октомври врската е стабилна, но инженерите сè уште не знаат што го предизвикало прекинот.
Засега е утврдено дека една група потисници („thrusters“) престанала да работи, па се вклучиле резервните. Ваквата замена е програмирана да се случи автоматски кога компјутерите ќе забележат проблем. Таа автоматска реакција се нарекува „fault protection“ и го става леталото во безбедна состојба, а нормалните операции се паузираат додека тимот не го испита проблемот.
„Ова е првпат леталото да направи вакво нешто, но сме во фаза од мисијата кога мора да го очекуваме неочекуваното“, изјави Карим Бадарудин, менаџер на мисијата во Лабораторијата за млазен погон (JPL) на NASA.
Во истата објава NASA соопшти дека на почетокот на септември ја завршила заштедата на енергија наречена „Big Bang“. Инженерите исклучиле три уреди на Voyager 1 и ги замениле со три алтернативи што трошат помалку струја, околу шест недели откако истото го направија на Voyager 2. Уредите го одржуваат леталото доволно топло, па замената морала да се направи истовремено.
Двете летала се напојуваат со радиоизотопски термоелектрични генератори и секоја година губат по околу 4 вати. Поради ова, NASA во април го исклучи инструментот за наелектризирани честички со ниска енергија на Voyager 1, а без „Big Bang“ ќе морале да исклучат уште еден најрано во летото 2027 година. Според NASA, двата преостанати инструменти сега ќе работат подолго од очекуваното, но NASA не наведе колку.
Voyager 1 патува со околу 61.000 километри на час, а на 18 ноември ќе биде на 25,89 милијарди километри од Земјата, односно на еден светлосен ден. Тоа значи дека на радиобрановите ќе им требаат 24 часа до леталото и уште 24 часа за одговорот да стигне назад.
На самото летало ништо нема да се смени кога ќе ја помине таа граница, па моментот е симболичен, но сепак импресивен за летало лансирано во 1977 година.
