Денес во Националната опера и балет во Скопје започна AI Tech Summit „Filip Avramchev“ 2026, кој на 22 и 23 септември на едно место ги обединува глобалните AI експерти, инженерите, бизнис-лидерите, стартапите и студентите.
Под мотото „Human x AI – Where Innovation Meets Human Potential“, дводневната програма е посветена на тоа како вештачката интелигенција веќе ги менува начинот на работа, развојот на производи, бизнисот, инфраструктурата и односот меѓу луѓето и технологијата. Покрај Main Stage програмата, Самитот вклучува AI Labs, AI Expo и AI Student Hackathon powered by OpenAI, со идеја посетителите AI да не го гледаат само како тема за разговор, туку и практично да го истражуваат и тестираат.
Виктор Сушелски: Прашањето не е дали AI ќе дојде, туку колку брзо ќе се адаптираме
Самитот го отвори Виктор Сушелски, еден од организаторите на AI Tech Summit „Filip Avramchev“ 2026, задолжен за програмата и координацијата на говорниците.
Во своето отворање тој се задржа на промената што AI веќе ја носи и на парадоксот што ја одбележува новата технолошка реалност: никогаш не било полесно да се создаде нешто, но никогаш не било потешко да се издвоиш.
AI денес им овозможува на еден човек или на мал тим да направат нешто за што до неодамна биле потребни многу повеќе луѓе, ресурси и време. Знаењето и технологијата стануваат подостапни, но со тоа расте и конкуренцијата, бидејќи истите можности им се достапни на луѓето и компаниите низ целиот свет.
За Македонија, според пораката од отворањето, токму тука се наоѓа и можноста и предизвикот. Земјата има талент, инженери, претприемачи и млади луѓе способни да создаваат конкурентни решенија, но потенцијалот сам по себе не е доволен. Поединците мора континуирано да учат, компаниите да ги трансформираат своите процеси, а поширокиот екосистем да размислува каде сака да се позиционира во свет во кој AI се развива со огромна брзина.
Една од главните пораки беше дека најголемиот ризик не е самата вештачка интелигенција, туку светот да продолжи да се движи додека ние остануваме во место.
Токму затоа AI Tech Summit е замислен како повеќе од серија говори. Целта е учесниците не само да слушаат за технологијата, туку да поставуваат прашања, да се поврзуваат, да експериментираат и по двата дена да заминат не само инспирирани, туку и подобро подготвени да преземат конкретни чекори.
Што следува на AI Tech Summit 2026?
Во продолжение на двата дена, програмата носи говорници од дел од најголемите светски технолошки компании, но и експерти кои работат на практичната примена на AI во различни индустрии.
Меѓу говорниците се Tilman Resch, GTM Germany and CEE во OpenAI, Koen van den Berg, AI Factory & DC Readiness Lead EMEA во NVIDIA, Fatos Ismali, Chief AI Architect во Microsoft UK, и Aishwarya Jadhav, Senior Machine Learning Engineer во Waymo.
На програмата се и Rui Machado од Maio Labs, James Pelton од Zencoder, Alistair Greenwood од OmniforceAI, Luca Berton, Irena Bojarovska од Zalando, Angela Kochoska од IDEO, Bart Veenman од KPMG Netherlands, Ilya Pavlenkov од Prometheus Robotics и Atanasko Boris Mitrev од The Autoware Foundation.
Темите ќе се движат од agentic AI и иднината на software engineering, преку AI инфраструктура и таканаречените AI Factories, до автономни возила, роботика, enterprise AI, data engineering и начинот на кој компаниите можат реално да создадат вредност од новата технологија. Меѓу најавените сесии е и панелот „Beyond Copilots: Agents and the Future of Software Engineering“, посветен на моментот кога AI престанува само да му помага на инженерот и почнува да презема делови од самиот процес на развој.
Во поширокиот дел од програмата се вклучени и Dr. Natasha Vita-More, футурист и Human-AI теоретичар, Kim Old од EMOTIV, C. Mikael Mattsson од svexa, Bojan Matovski од PathKeeper Surgical, Elena Dimoska од Semos Education и Natasha Bozinovska Mirkova од Represent Communications Macedonia, со што дискусијата се проширува и кон човечкиот потенцијал, здравството, бизнис-трансформацијата и начинот на кој AI го менува односот меѓу технологијата и луѓето.
Паралелно продолжува и AI Student Hackathon powered by OpenAI. На 22 септември студентските проекти се оценуваат од жири, а трите најдобри тима на 23 септември ќе ги претстават своите решенија на Main Stage.
AI Tech Summit „Filip Avramchev“ 2026 продолжува до 23 септември во Националната опера и балет во Скопје, со Main Stage сесии, практични AI Labs, Expo содржини, демонстрации и финале на студентскиот хакатон.
Како што беше нагласено уште на отворањето, иднината со AI не е нешто што допрва треба да започне. Таа веќе се случува, а прашањето е колку подготвени ќе бидеме да учествуваме во неа.
