Во текот на вчерашниот ден, SpaceX го направи единаесеттото тест лансирање на нивното најголемо и најмоќно летало, Starship. Ова е и последното тест лансирање на оваа верзија од Starship, по што наредните лансирања ќе продолжат со наредната, односно трета верзија.
Лансирањето е успешно извршено на двата дела од Starship, кои се развиени да бидат повторно употребливи, но тестот не вклучуваше нивно фаќање од страна на кулата од каде се лансирани.
Вчерашното лансирање е и годишнина од првото успешно фаќање на ракетата Super Heavy, која е долниот дел од Starship, од страна на кулата наречена Mechazilla.
Тест лансирањето беше стандардно извршено во две фази, односно лансирање на Super Heavy и Starship леталото, по што следува издвојување на Super Heavy и продолжување на летото на Starship.
Двете летала беа успешно вратени на Земјата, а дури беше демонстрирана и можноста за „лебдење“ на Super Heavy пред исклучување на сите мотори и пад во океанот.
Снимката од преносот во живо можете да ја погледнете во продолжение.
