Apple работи на развој на нова безбедносна функција за iPhone, дизајнирана автоматски да го заклучи уредот во моментот кога системот ќе детектира дека тој е насилно земен од рацете на корисникот.
Во изминатите години, компанијата значително ги подобри механизмите за заштита од кражба, воведувајќи опции како Find My, Activation Lock и Stolen Device Protection. Сепак, најголемиот дел од овие заштитни мерки стануваат речиси бескорисни доколку крадецот успее да го земе уредот во моментите кога тој е сè уште отклучен.
Новата функција е насочена токму кон овој проблем, а според својот концепт наликува на опцијата Theft Detection Lock која веќе постои кај Android уредите.
За да препознае дали навистина станува збор за кражба, новиот безбедносен систем ќе се потпира на комбинација од повеќе различни сигнали. Главната улога во детекцијата ќе ја има „акцелерометарот“ вграден во самиот iPhone, кој ќе ги следи физичките движења на уредот.
За дополнително да ја процени ситуацијата, функцијата ќе ја следи и физичката оддалеченост помеѓу телефонот и поврзаниот Apple Watch. Зголемувањето на дистанцата меѓу овие два уреди ќе биде уште еден индикатор дека телефонот повеќе не е кај неговиот вистински сопственик.
Иако софтверскиот код открива дека функцијата е во активен развој, засега нема детали за точниот датум кога таа ќе биде официјално најавена.
