Познатиот изворот на гласини Instant Digital, кој објавува на кинеската мрежа Weibo, сподели идеја за иден iPhone кој би ја задржал сегашната ширина, но би бил пократок. Сепак, во објавата се наведува дека изгледот и пропорциите се лична шпекулација.
Според оваа идеја, Apple би можел да го скрати класичниот iPhone, односно моделот што не е на преклоп, откако на екранот ќе остане само еден отвор за камерата или откако предната камера целосно ќе се пресели под екранот. Екранот би изгубил висина колку една статусна лента, па односот на страните би се сменил од околу 19,5:9 на околу 18:9, пишува MacRumors. Така телефонот наводно би бил полесен за држење и користење со една рака.
За да не се изгуби простор за содржина, контролите што сега стојат под статусната лента би се преселиле во истиот ред со часовникот и системските икони. Така пократкиот екран би можел да ја прикаже истата количина информации.
Apple веќе го менуваше начинот на кој iOS го користи горниот дел од екранот. iPhone 18 Pro моделите добија помал „динамичен остров“ кој прикажува до три активности истовремено, а кај iPhone Duo статусната лента е сместена во аголот, додека „динамичниот остров“ стои вертикално на страната од надворешниот екран.
Не е познато кога iPhone ќе добие екран без отвор за камерата. Изворот Digital Chat Station претходно тврдеше дека Apple тестира камера под екранот, како и меѓурешение со видлив отвор за предната камера, слично како кај iPhone Duo. Аналитичарот за екрани Рос Јанг, пак, очекува iPhone Pro моделите од 2028 година да го задржат отворот на средината на екранот.
Во дискусијата под следна објава, друг корисник напиша дека очекува отворот и односот 19,5:9 да останат и во 2027 и во 2028 година. Instant Digital одговори дека според некои извори отворот би можел да исчезне во 2028 година.
Во посебна објава, Instant Digital напиша дека сè повеќе се чувствува дека iOS значително ќе се промени по претставувањето на јубилејниот iPhone во 2027 година и во изгледот и во начинот на користење. Според Марк Гурман од Bloomberg, овој модел ќе има заоблено стакло и потенки рамки околу екранот, во најголемата промена на Pro линијата од iPhone X, а Digital Chat Station претходно ги објави можните големини на неговите екрани.
Вакво нешто има и преседан. Кога Apple го отстрани копчето Home кај iPhone X во 2017 година, iOS 11 донесе навигација со повлекување нагоре.
