Google официјално го претстави Pixel 11 Pro Fold, најновиот додаток во нивната линија на уреди на преклоп. Според информациите од производителот, новиот модел доаѓа со освежен дизајн кој е за 10 проценти полесен од претходната генерација и за 1 милиметар потенок.
Овие димензии овозможуваат уредот да нуди чувство слично на стандарден паметен телефон кога не е отворен. Уредот се одликува со 8-инчен внатрешен екран на преклопување и 6,5-инчен надворешен екран, кој сега користи нов стаклено-керамички материјал за поголема отпорност на гребаници.
Задниот дел е изработен од композитен материјал со „стаклени влакна“, што во комбинација со редизајнираната шарка дополнително ја зголемува физичката издржливост, а присутна е и IP68 сертификација за отпорност на вода и прашина.
Хардверската основа на Pixel 11 Pro Fold ја сочинува новиот Tensor G6 процесор, кој е надополнет со 16 гигабајти работна меморија во сите понудени верзии.
Системот на камери вклучува 48 мегапикселен главен сензор, 10,5 мегапикселна ултраширока камера и 10,8-мегапикселен телефото објектив со петкратно оптичко зумирање. За видео повици и автопортрети се задолжени две 10-мегапикселни камери.
Еден од позабележителните хардверски додатоци е таканаречениот „HiLight“ LED индикатор сместен на модулот за камери, кој служи за светлосни известувања при активна употреба на асистентот Gemini или при добивање повици од одредени контакти.
Целата детална објава од Google можете да ја прочитате тука.
