Bitwarden, еден од попознатите менаџери за лозинки, ги претстави бета верзиите на своите редизајнирани апликации. Корисниците можат да го пробаат новиот изглед и да остават забелешки пред тој да им стане достапен на сите корисници.
Менаџерот за лозинки ги чува сите лозинки во шифриран сеф, кој се отклучува со една главна лозинка, а потоа самиот ги пополнува при најава на страниците. Bitwarden е основан во 2016 година и е со отворен код, односно неговиот код е јавно достапен на GitHub. Според компанијата, го користат над 15 милиони луѓе и повеќе од 80.000 фирми.
Промените во новиот дизајн се најмногу во организацијата. Организациите сега се наречени „Vaults“ (сефови), колекциите „Shared folders“, а според соопштението на компанијата, и папките стануваат „My Folders“. Bitwarden нагласува дека се менуваат само имињата, а пристапот и дозволите остануваат исти.
Дополнително, страничното мени е реорганизирано, а ново копче овозможува лесно префрлање меѓу личниот сеф и сефовите на фирмата или семејството. Пребарувањето и филтрите сега се во една лента над листата, наместо во две одделни контроли.
Сепак, бета верзијата е ограничена. Засега е достапна само за додатокот од Chrome Web Store, кој работи во Chrome 134 и понови и во другите прелистувачи базирани на Chromium, како и за апликацијата за Windows и macOS. За Firefox засега нема бета, а ја нема ни за корисниците со свој сервер за Bitwarden.
Bitwarden препорачува постојниот додаток да се исклучи или бетата да се инсталира во друг прелистувач или профил, а постојната апликација за компјутер треба да се отстрани. Бетата може да го расипе отклучувањето со отпечаток или лице во додатокот, што се решава со повторна инсталација на апликацијата за компјутер по тестирањето.
Бетата трае до 31 октомври, а потоа е важно да се вратат редовните апликации за да продолжат да се добиваат ажурирањата.
Не е познато кога новиот дизајн ќе стигне до сите корисници и до мобилните апликации. Следната верзија треба да донесе споделување ставки преку линк, а тимот работи и на автоматско внесување на компјутер и поддршка за „passkeys“ во оперативниот систем, без рок.
