По првичната најава за воведување ознаки на содржината генерирана од вештачка интелигенција, Anthropic објави детално објаснување за техничкото функционирање на дигиталниот воден печат во моделот Claude.
Технологијата се базира на пристапот SynthID-Text развиен од Google DeepMind, а главната цел на компанијата е да им укаже на корисниците дека означувањето е целосно невидливо и не го менува нивното корисничко искуство. Во самиот текст не се додаваат никакви скриени карактери кои би го нарушиле форматот и не се користат дополнителни токени што би ја поскапеле услугата.
Јазичните модели го генерираат текстот збор по збор, избирајќи ја следната логична опција преку систем на случајност. Водениот печат ја менува токму оваа компонента, користејќи специфичен клуч и претходно напишаните зборови за да го насочи изборот на моделот. На овој начин се создава шема која обичниот читател не може да ја забележи, но е препознатлива за системот што го поседува клучот за детекција. Ова се одвива природно, без моделот да биде принуден да користи невообичаени синоними или да се наруши читливоста на одговорите.
Ефективноста на овој метод има одредени технички ограничувања. Водениот печат е помалку функционален при пишување компјутерски код или строго фактички реченици, каде што барањето за апсолутна прецизност не остава простор за избор на алтернативни зборови.
Слична е ситуацијата и при лектура на текст напишан од човек, бидејќи малите граматички интервенции од страна на вештачката интелигенција не се доволни за да се регистрира препознатливата шема. Ознаката исто така е потешко да се детектира кај многу кратки текстуални извадоци.
Од аспект на приватноста, ознаката не содржи никакви лични информации и не може да се поврзе со конкретен корисник, организација или разговор.
За да се овозможи проверка на автентичноста на текстовите во иднина, Anthropic најави дека наскоро ќе лансира специјализиран интерфејс за програмирање на апликации наменет за детекција.
Што се однесува до фотографиите и другите генерирани датотеки, системот нема да користи воден печат, туку ќе се потпира на стандардните C2PA метаподатоци.
