GOG ја одбележа својата 18-годишнина со првиот GOG Showcase, на кој официјално потврди дека апликацијата GOG Galaxy доаѓа на Linux. Според објавата на компанијата, истовремено е преработена и верзијата за Windows и Mac, која треба да биде поедноставна, побрза и да нуди попрегледни начини за прикажување на библиотеката со игри.
На страницата за годишнината GOG ја опишува новата Galaxy како следна генерација на својот „launcher“, побрза, целосно прилагодлива и со модерен изглед. Таму стои дека пристигнува во 2027 година, а заинтересираните веќе можат да се пријават на листата на чекање за бета верзијата. Точен датум засега нема.
Компанијата нагласува дека Galaxy и понатаму ќе биде опционална, па купените игри и натаму ќе можат да се преземаат и чуваат преку инсталациски датотеки што не бараат интернет. Корисниците на Linux досега ја имаа само таа можност, бидејќи GOG нуди Linux верзии за игрите што го поддржуваат овој систем, но самата апликација никогаш не беше достапна за него.
Во јули GOG потврди дека работи на ова и дека вработил специјалист за Linux, но тогаш ко-извршниот директор Кшиштоф Паплињски велеше дека е рано за конкретни планови и рокови. Ни сега не е познато дали апликацијата ќе може да ги стартува и игрите што постојат само за Windows, на пример преку Wine или Proton, ниту кои дистрибуции ќе бидат поддржани.
Вакво нешто не изненадува откако сопственикот на GOG, Михал Кичињски, на почетокот на годината го нарече Windows „софтвер со многу низок квалитет“.
На настанот GOG ја претстави и GOG Social, нов простор за заедницата во кој ќе може да се објавуваат галерии со слики од екранот, видеа и анкети, со одговори по теми и, според компанијата, „без алгоритамски шум“. Објавите ќе можат да се поврзуваат со игрите од продавницата, а ќе има и ознаки за откривање на заплетот. Пријавите за затворената бета верзија се отворени од денес.
Покрај ова, GOG објави седум обновени изданија на класични игри на EA, меѓу кои Wing Commander: Prophecy и Road Rash, а сопствениците на постарите Wing Commander игри на GOG соодветното ново издание го добиваат бесплатно. Оригиналните верзии веќе нема да се продаваат одделно, туку само во пакет со новите.
