Blue Origin, вселенската компанија на Џеф Безос, го одложи враќањето на ракетата New Glenn во употреба за јануари 2027 година. Компанијата досега планираше повторно да лета пред крајот на годината, но тоа нема да се случи, објави Financial Times, а информацијата ја потврди и Reuters.
New Glenn експлодираше на 28 мај за време на тест со палење на моторите на рампата, само неколку дена пред лансирањето на сателити на Amazon. Експлозијата ја уништи ракетата и тешко ја оштети рампата Launch Complex 36 на Кејп Канаверал во Флорида, единствената од која New Glenn може да полета. Според Blue Origin, проблемот започнал кај главниот вентил за кислород на еден од моторите BE-4.
Во интерна порака до вработените, која ја виде Reuters, директорот Дејв Лимп наведува дека летното време ја забавило обновата. „Обновата со ова темпо не беше лесна. Оние од вас што живеат на Кејп или доаѓаат таму знаат дека времето ова лето не ни беше пријател“, напишал Лимп.
Тој додава дека компанијата ја поправила и повторно ја поставила кулата за пристап до ракетата и го обновила мостот за лансирање. Според Bloomberg, Blue Origin одби да коментира.
Одложувањето ја погодува и Amazon, другата компанија на Безос. Нејзината сателитска мрежа Amazon Leo, конкурент на Starlink од SpaceX, зависи од Blue Origin како еден од клучните превозници, а следниот лет на New Glenn требаше да однесе 48 сателити.
Ракетата е важна и за NASA, бидејќи треба да го лансира леталото Blue Moon, со кое агенцијата планира да слетува на Месечината. Според плановите, „слетувачот“ на Blue Origin треба да биде првиот со кој Orion ќе се спои во орбитата околу Земјата за време на мисијата Artemis III во 2027 година. Не е познато дали новото одложување ќе влијае и на овој распоред.
New Glenn има само три лета откако првпат полета во јануари 2025 година, а при третиот, во април, вториот степен не ја достигна планираната орбита. Во исто време SpaceX од мај лета со третата генерација на Starship, која ја претстави во април, па изгледа дека заостанувањето на Blue Origin зад конкурентот само се зголемува.
Компанијата сепак гледа понапред, па денеска претстави трет степен за New Glenn, наречен GS3, наменет за мисии до геостационарна орбита и подалеку од Земјата. Првата најавена мисија со него е планирана за 2028 година.
