DuckDuckGo, компанијата позната по пребарувачот и прелистувачот фокусирани на приватноста, ги објави годинешните донации. Оваа година компанијата дава 1.000.000 долари на организации кои, според DuckDuckGo, работат интернетот да биде поприватен, побезбеден и со поголема конкуренција.
Ова е 16. година по ред во која DuckDuckGo донира, а вкупната сума од 2011 година наваму, според нивната страница за донации, надминува 9 милиони долари. Во 2024 и 2025 година компанијата донираше по 1,1 милион долари, па годинешната сума е за 100.000 долари помала.
Најголемата поединечна донација од 75.000 долари оди кај Public Knowledge, американска организација која се залага за отворен интернет и достапни комуникациски алатки. По 50.000 долари добиваат Signal, ARTICLE 19, European Digital Rights (EDRi), германската GFF, Open Home Foundation, која стои зад Home Assistant, како и Demand Progress, Digital Progress Institute и Tech Policy Press.
Дополнително, по 25.000 долари добиваат Electronic Frontier Foundation (EFF), Tor Project, Internet Archive и австриската noyb, која според нивните податоци има поднесено повеќе од 850 случаи против големите технолошки компании. Internet Security Research Group, организацијата зад бесплатните сертификати Let’s Encrypt, добива 30.000 долари, а на листата е и Perl and Raku Foundation, која се грижи за развојот на програмските јазици Perl и Raku.
EFF оваа година добива половина од минатогодишните 50.000 долари, а во 2024 година беше најголемиот добитник со 100.000 долари. Во објавата не се објаснува зошто се менуваат износите.
Дел од организациите на листата се залагаат за поголема конкуренција и ограничување на моќта на големите технолошки компании. Вакво нешто не изненадува, бидејќи DuckDuckGo со години се жали на доминацијата на Google кај пребарувањето, па донациите веројатно се и дел од таа битка.
