Извршниот директор на Paramount Skydance, Дејвид Елисон, објави дека компанијата што ќе настане со преземањето на Warner Bros. Discovery ќе се вика Skydance. Името го соопшти во својата прва објава на X, пред завршувањето на договорот.
Според заедничкото соопштение на двете компании, спојувањето се очекува да заврши во вторник, 6 октомври, доколку се исполнат вообичаените услови. Договорот е вреден околу 110 милијарди долари, а дојде по долга битка во која Netflix претходно имаше договор за студиото и стриминг бизнисот на Warner Bros.
Дванаесет американски сојузни држави, предводени од Калифорнија, го оспорија спојувањето, тврдејќи дека може да ја намали конкуренцијата. Судијката Мартинес-Олгин во среда, 30 септември, ја одобри спогодбата со нив.
Skydance е името на компанијата, а не на стриминг услугата. Дел од медиумите шпекулираат дека така би можела да се вика и заедничката услуга од HBO Max и Paramount+, но тоа не е потврдено.
Спојувањето на услугите е најавено уште во март, кога Елисон изјави дека ќе ги обединат „во една посилна платформа во наредните години“. Според него, двете услуги заедно имаат повеќе од 200 милиони претплатници, но тоа е збир на двете бази одделно, па корисниците што плаќаат за двете се бројат двапати.
Ниту еден извор не кажува што ќе се случи надвор од САД. Кај нас HBO Max е достапен од март 2022 година, а Paramount+ не се нуди. Содржините на Paramount во Македонија и регионот стигнуваат преку SkyShowtime, заедничка услуга на Comcast и Paramount, достапна кај нас од февруари 2023.
Дополнително, сопствениците на SkyShowtime во септември објавија дека ја разгледуваат нејзината иднина, вклучително и можно гасење. Одборот нагласи дека одлука сè уште нема, а од вработените побара да го задржат темпото и во 2027 година.
Поради ова, засега не е познато како спојувањето ќе се одрази на корисниците во Македонија.
