Тимот на Universal Blue ја објави верзијата 45 на Bazzite, „гејминг“ Linux дистрибуцијата која стана популарна алтернатива на Windows. Новата верзија е базирана на Fedora 45 и доаѓа со GNOME 51.1 и KDE 6.8.2, Mesa 26.2.6 и „kernel“ 7.2.15, освен кај NVIDIA верзиите со долгорочна поддршка („LTS“), кои добиваат 6.18.60.
Најинтересната новина е поврзана со Epic. Компанијата во октомври најави нова верзија на Easy Anti-Cheat за Linux, која прво ќе ја тестира во Fortnite, а потоа ќе ја понуди и на другите програмери. Тоа значи дека Fortnite и други игри што досега не работеа на Linux поради заштитата од мамење би можеле да стигнат и таму, но не е познато кога.
Новата заштита бара осум безбедносни функции, меѓу кои потпишан „kernel“, „TPM 2.0“, „Secure Boot“ и „kernel lockdown“, а „IOMMU“ е услов само кај уредите што не се рачни. Поради ова Bazzite 45 додава команда која ги проверува сите услови и кажува што недостасува, без самата да менува нешто на системот. Epic дополнително го додаде клучот на Universal Blue на својата листа на доверливи клучеви, заедно со Ubuntu, Fedora, Debian и openSUSE.
Сепак, ова засега не важи за сите уреди. Според Epic, Steam Deck не ги поддржува потребните функции, а компанијата разговара со Valve и се надева на поддршка во иднина. Тимот на Bazzite дополнително предупредува дека сопствениците на Steam Deck не смеат да го вклучуваат „Secure Boot“, а корисниците на другите рачни конзоли засега не треба да го вклучуваат „kernel lockdown“ додека не најдат решение.
Од другите новини, ASUS ROG Xbox Ally X20 сега е поддржан во стабилната верзија, додадена е почетна поддршка за рачната конзола Acer Predator Atlas 8, а повеќе Logitech волани работат без дополнително поставување. Според тимот, со новиот начин на делење на системската слика ажурирањата сега можат да бидат мали и само 100 MB.
Голем дел од работата е невидлив за корисниците, бидејќи процесот на изградба на системот е поедноставен и значително забрзан. Во нестабилната гранка веќе се тестира „kernel“ 7.3.1 со фокус на „HDMI 2.1“ и „VRR“, после серијата 7.2, која самите ја опишуваат како „доста проблематична“.
Корисниците што помагаа во тестирањето сега можат да се префрлат на стабилната верзија 45 со една команда, а се тестираат и големи подобрувања за Bazzite Portal.
