Објавена е верзијата 7.1 на системот за управување со содржини WordPress, која го носи кодното име „Mary Lou“ во чест на џез пијанистката Мери Лу Вилијамс. Ова издание е направено со цел да го подобри начинот на кој корисниците се движат низ системот, го контролираат дизајнот и соработуваат со други лица.
Една од основните промени е што административната лента сега го следи корисникот низ целиот систем, обезбедувајќи константен пристап до алатките, независно дали се пишува објава или се менува изгледот на страницата.
Во делот на дизајнот, WordPress 7.1 воведува контроли за „респонзивен“ стил директно во уредувачот на страната. Корисниците можат да го приспособуваат изгледот на блоковите за различни големини на екрани без сопствен CSS код.
За уредувањето содржини како слики додаден е нов прозорец со напредни опции за сечење на сликите, превртување, ротација и промена на метаподатоците. Обработката на сликите сега се извршува директно во прелистувачот, намалувајќи го оптоварувањето на серверите. Додадена е и поддршка за понови формати како AVIF, HEIC и HDR, како и опционално конвертирање на GIF во видео формат.
Алатките за соработка се унапредени преку проширување на функционалноста за белешки. Тие сега можат да се оставаат на специфични делови од текстот, поддржуваат збогатен текст и им овозможуваат на корисниците да се означуваат меѓусебно.
Системот вклучува и два нови блока, еден за креирање аудио плејлисти и друг за организирање на содржината преку „табови“. За корисниците е достапна и опцијата за поставување различни стилови за копчињата во зависност од нивната активна состојба.
За програмерите, достапен е јавен API за SVG икони кој дозволува регистрација на сопствени колекции во уредувачот. Воведен е нов систем за стандардизирање на интерфејсите и проширувања на Abilities API кои го олеснуваат интегрирањето на нови алатки. Со цел поголема стабилност, уредувачот на објави сега е целосно изолиран за да се спречи мешање на стиловите со содржината.
Новата верзија вклучува над 1500 подобрувања и поправки, креирани од повеќе од 800 соработници. Покрај техничките додатоци, WordPress 7.1 носи и подобрена пристапност преку напредна поддршка за читачите на екран и нови функции за кориснички совети.
