Microsoft започна процес на спојување на својата корисничка апликација Copilot со деловно ориентираната Microsoft 365 Copilot во еден унифициран производ.
Овој потег има за цел да го поедностави корисничкото искуство, кое досега бараше користење на две одделни апликации и да ја подобри конкурентноста на компанијата на пазарот каде што доминираат решенија како ChatGPT и Gemini.
Со новиот пристап, корисниците ќе можат да продолжат да ги користат двата вида на сметки и едноставно да се префрлаат меѓу приватните и корпоративните профили преку еден интерфејс.
Како дел од оваа консолидација, компанијата одлучи до 18 август да укине неколку функции кои не успеале да привлечат доволно корисници. Меѓу отстранетите опции се групните разговори, поткастите генерирани од вештачка интелигенција, како и сите експериментални додатоци од Copilot Labs.
Дополнително, бесплатниот пристап до алатката за длабинско истражување се укинува, додека претплатниците на професионалните пакети ќе добијат замена преку нова алатка наменета исклучиво за нив.
Промените го опфаќаат и визуелниот дел на асистентот. Анимираниот аватар Mico, кој беше воведен за да им даде физичка претстава на гласовните интеракции, се отстранува од главната апликација и се префрла во едукативната платформа на компанијата.
Во однос на податоците, сите постоечки фајлови од досегашната самостојна апликација автоматски ќе бидат мигрирани на услугата OneDrive, иако е нагласено дека за време на транзицијата одредени функции може привремено да бидат недостапни.
