Apple денес официјално ги претстави своите најнови процесори, M6 и M5 Ultra, кои носат унапредени перформанси и хардверска оптимизација за задачи поврзани со вештачка интелигенција.
Марк Гурман најави дека од компанијата планираат да го претстават М6 чипот, но дека ќе ги прескокнат M6 Pro и M6 Max верзиите, па засега неговите најави се остваруваат.
Моделот M6 е интегриран во новиот компјутер Mac mini, додека помоќниот M5 Ultra е наменет за десктоп работната станица Mac Studio. Двата чипа ја нагласуваат стратегијата на компанијата за локално извршување на сложени пресметки и модели на вештачка интелигенција директно на самите уреди, нудејќи им на крајните корисници поголема брзина и приватност.
Процесорот M6 е првиот чип на Apple изработен во новиот 2-нанометарски технолошки процес, што овозможува поголема густина на транзистори и подобра енергетска ефикасност.
Тој располага со 12-јадрен централен процесор, кој вклучува две нови супер јадра, четири јадра за перформанси и шест јадра за ефикасност. Графичкиот процесор исто така има 12 јадра опремени со вградени невронски акцелератори, додека новиот двоен 16-јадрен невронски систем ја удвојува моќта за задачи со вештачка интелигенција во споредба со претходната генерација.
Овој чип поддржува до 32 GB унифицирана меморија со пропусен опсег од 170 GB во секунда.
Моделoт M5 Ultra ја претставува првата архитектура со четири плочки во рамки на чиповите од M-серијата. Користејќи ја технологијата UltraFusion, тој поврзува два M5 Max чипа за да функционираат како единствен процесор.
Резултатот е масивен систем кој нуди до 36 процесорски и 80 графички јадра. Според објавените спецификации, M5 Ultra нуди до 1.25 пати повисоки перформанси при работа со едно јадро во споредба со постариот M3 Ultra. Чипот поддржува до 512 GB унифицирана меморија со пропусен опсег од 1.2 терабајти во секунда, што овозможува вчитување на обемни јазични модели со стотици милијарди параметри директно во локалната меморија.
Претставниците од одделот за силиконски инженеринг на Apple истакнуваат дека новите чипови претставуваат важен напредок во балансирањето на високата процесорска моќ и енергетската ефикасност. Целокупниот хардвер е дизајниран директно да се интегрира со развојните алатки како Core ML и Metal, овозможувајќи им на програмерите и креативните професионалци да ги искористат новите архитектури за побрзо „компајлирање“ код, видеомонтажа и користење на локалните функции од пакетот Apple Intelligence.
