Microsoft почна постепено да ја воведува опцијата „Cloud rebuild“ во Windows 11, која го реинсталира системот со слика и „драјвери“ преземени од Windows Update, дури и кога Windows не може да се стартува. Таа е дел од опционалната надградба KB5127936 за верзиите 25H2 и 26H2, со која стигнаа и новите „контекстуални“ менија.
Опцијата се тестираше кај учесниците во програмата Windows Insider уште од летото. Windows 11 и досега можеше да се реинсталира со преземање од интернет, преку опцијата „Cloud download“ што Microsoft ја најави уште во 2019 година за Windows 10. Разликата е што Cloud rebuild, според документацијата на Microsoft, ги презема и „драјверите“ и не зависи од исправноста на постоечката инсталација.
Реинсталацијата се стартува од „Settings“, во делот „System“ и „Recovery“, со копчето „Rebuild PC“. Ако Windows не може да се стартува, компјутерот по неколку неуспешни обиди сам влегува во околината за обновување (WinRE), каде опцијата се наоѓа во менито „Troubleshoot“.
За преземањето е потребна интернет врска преку кабел или Wi-Fi, но според документацијата на Microsoft засега се поддржани само WPA2-Personal мрежи. Со истата надградба околината за обновување почнува сама да користи дел од Wi-Fi мрежите веќе зачувани во Windows, вклучително некои мрежи со сертификати, какви што имаат компаниите.
Сепак, ова е целосна реинсталација. Според Microsoft дискот се форматира и се бришат сите локални датотеки, сметки, апликации и поставки, додека датотеките во OneDrive и другите сервиси во „облакот“ не се засегнати.
Корисниците можат да изберат обично бришење, по кое датотеките можеби може да се вратат со специјализирани алатки или безбедно бришење со вградената можност на дискот. Второто е неповратно, а Microsoft признава дека резултатот зависи од тоа дали дискот правилно ја поддржува оваа операција, бидејќи Windows не може сам да провери што направил дискот.
Дополнително, компјутерот треба да е приклучен на струја за цело време, бидејќи прекинот може да го остави Windows без можност за стартување. Потребно е и околината за обновување да е вклучена и исправна, производителот да има ставено мрежен „драјвер“ во неа, а уредот да ги исполнува минималните хардверски услови за Windows 11.
Изгледа дека за многу корисници USB уредот за обновување ќе стане помалку потребен, иако Microsoft го наведува токму него како решение ако Cloud rebuild се прекине.
Според Microsoft, ИТ администраторите можат реинсталацијата да ја стартуваат и од далечина, преку системите за управување со уреди како Microsoft Intune.
Бидејќи опцијата стигнува постепено, не мора да се појави веднаш ни по инсталацијата на надградбата, која се инсталира рачно во Windows Update, под „Advanced options“ и „Optional updates“.
Microsoft не кажува кога Cloud rebuild ќе стигне до сите, а според Windows Central тоа би требало да се случи релативно наскоро.
