MediaTek официјално го претстави Dimensity 9600 Pro, нивниот нов процесор наменет за мобилните уреди од највисоката класа, кој е прв што го користи новиот 2-нанометарски производствен процес.
Овој чип носи нова архитектура која обезбедува зголемени перформанси, интегрирана поддршка за напредни функции со вештачка интелигенција и драстично намалување на потрошувачката на енергија кај повеќејадрените операции за дури 61%, според компанијата.
Првите телефони кои ќе работат на Dimensity 9600 Pro, како и на дополнително најавената верзија Dimensity 9600M, се очекуваат на пазарот во текот на овој квартал.
Новиот процесор се потпира на архитектура која ги користи само големите јадра, со конфигурација од вкупно осум јадра. Таа вклучува две C2-Ultra јадра со работна фреквенција до 4,55 GHz, три C2-Pro јадра на 4,35 GHz и уште три C2-Pro јадра на 3,1 GHz.
Овој дизајн нуди до 17% подобри перформанси кај еднојадрените и до 15% кај повеќејадрените процеси во споредба со претходната генерација. Воедно, Dimensity 9600 Pro за прв пат воведува поддршка за новата LPDDR6 работна меморија и UFS 5.0 просторот за складирање податоци.
Вештачката интелигенција е централен фокус на новиот чип, поради што Dimensity 9600 Pro користи архитектура со две единици за „невронска“ обработка. Од компанијата истакнуваат дека уредите имаат потреба од поголема интелигенција за да одговорат на растечките барања на корисниците, па новиот чип поддржува модели со големина до 30 милијарди параметри.
Ова овозможува попаметна анализа на податоците директно во самиот телефон, проактивна асистенција и персонализирани одговори, притоа намалувајќи ја потрошувачката на енергија за 40% кај процесите кои се постојано активни.
На полето на графичките перформанси, чипот ја користи новата G2-Ultra NX единица која носи за 27% повисоки максимални перформанси при игрите и намалена потрошувачка на енергија за 24%. Поддржани се и 18% побрз „raytracing“ и можност за играње со 185 кадри во секунда.
Процесорот го содржи и Imagiq 1290 модулот за обработка на слика кој во соработка со единиците за вештачка интелигенција овозможува снимање на видео со исклучително забавена снимка во 4K резолуција при 240 кадри во секунда.
Со преминот кон новиот 2-нанометарски производствен процес, Dimensity 9600 Pro директно ќе се соочи со неодамна претставениот A20 Pro чип на Apple. Додека процесорот на Apple работи на нешто повисока фреквенција од 4,93 GHz и поставува рекорди во единечните процеси кои ги надминуваат дури и актуелните десктоп процесори, MediaTek со своите максимални 4,55 GHz примарно се фокусира на драстично намалување на потрошувачката на енергија за 61% при повеќејадрените операции.
Со оглед на тоа што постарата генерација на MediaTek заостануваше зад новиот A20 Pro, подобрувањата во брзината од 15 до 17% кои ги носи Dimensity 9600 Pro ќе помогнат да се намали таа разлика.
Сепак, вистинската конкурентност на пазарот нема да се мери само преку сировата брзина на хардверот, туку преку енергетската ефикасност и можностите за локална обработка на вештачката интелигенција кои директно го подобруваат секојдневното корисничко искуство.
