Google во Chrome 157 официјално го пушти „HTML-in-Canvas“, нов „API“ што им дозволува на програмерите да ставаат обични веб елементи, како текст, формулари и копчиња, директно во графиката што ја црта прелистувачот. Тоа значи дека текстот во веб игра или 3D сцена може да се означи, копира, преведе и пребара, исто како на обична веб страница.
Сложените веб апликации и игри ја цртаат својата содржина во т.н. „canvas“, површина од пиксели за брза 2D и 3D графика преку графичкиот процесор. За прелистувачот, пак, тоа е само слика, па во неа не работат пребарувањето со Ctrl+F, преводот, автоматското пополнување ниту читачите на екран.
Програмерите досега, според Google, имаа два излеза. Текстот можеа да го цртаат како пиксели и сами да прават невидлива верзија за пристапност или да ставаат веб елементи над графиката, кои при движење на камерата во 3D може да заостануваат и да треперат. Дополнително, таквите елементи секогаш стојат над целата сцена, па не можат да бидат, на пример, зад 3D објект или да се гледаат во огледало.
Според Google, со новиот пристап веб содржината станува дел од самата графика, а прелистувачот продолжува да ја третира како обичен текст. Ова работи и во 2D и во 3D графиката преку „WebGL“ и „WebGPU“. Работат и додатоците за прелистувачот и алатките за програмери, а пребарувачите и AI агентите можат да ја прочитаат содржината.
Google како примери ги наведува големите апликации што цртаат сè во „canvas“, игрите со читливи книги или терминали во 3D светот и креативните алатки што комбинираат типографија со графички ефекти. Популарните библиотеки за веб графика Three.js, Babylon.js, PlayCanvas и PixiJS веќе ја поддржуваат новата можност, иако кај Three.js поддршката засега е експериментална.
Пред официјалното пуштање, Google неколку месеци ја тестираше функцијата со програмерите и во тоа време ја менуваше според нивните забелешки. Chrome 157 стигна до корисниците на 3 ноември, а прелистувачот од септември добива нова верзија на секои две недели.
Засега станува збор за можност на Chrome. Според страницата на функцијата, Apple има позитивен став и почнале со рана работа за Safari, а Mozilla сè уште нема официјален став за Firefox. Таму стои и дека спецификацијата е сè уште во развој и се усогласува со забелешките од другите прелистувачи, па новиот „API“ може уште да се менува.
Google и самиот им препорачува на програмерите да подготват замена за прелистувачите без поддршка, па веројатно ќе помине време пред веб апликациите масовно да почнат да ја користат.
