The Document Foundation, непрофитната организација зад бесплатниот и доста познат пакет апликации LibreOffice, објасни зошто во основната инсталација засега нема вештачка интелигенција. Според фондацијата, LibreOffice 26.8, објавен на 26 август, не содржи функции со генеративна вештачка интелигенција и не праќа документи до надворешни сервиси.
Повод бил коментар под најавата: „Значи, без AI сега е функција?“. Фондацијата вели дека не ја отфрла вештачката интелигенција, но софтвер што го користат десетици милиони корисници нема да добие ваква функција во основната инсталација додека таа не исполни шест услови.
Корисникот треба сам да избира каде работи моделот, локално, на своја инфраструктура или кај сервис што самиот го избрал. Ниту една содржина не смее да го напушти компјутерот без негова одлука, нема никакво собирање податоци („telemetry“), а интеграцијата не смее да зависи од само една компанија.
Создадената содржина мора да биде во отворениот формат ODF, а функцијата целосно опционална, односно да може да се отстрани и да ја нема во интерфејсот.
Според фондацијата, денес нема интеграција што ги исполнува сите услови, а би можела да биде вклучена во основните поставки и поддржана низ целиот животен циклус на една верзија.
За ВИ засега остануваат додатоците од трети страни. Повеќето, според фондацијата, се поврзуваат со модел што работи локално преку Ollama, LM Studio или друга алатка компатибилна со „API“ на OpenAI, па документот не го напушта компјутерот. Сепак, треба да се провери дали додатокот не праќа податоци во облакот.
Разликата со конкуренцијата фондацијата ја објаснува со бизнис моделот: за компанија што продава претплати, ВИ асистентот оправдува повисока цена и го зајакнува аргументот документите да останат во нејзината инфраструктура, а The Document Foundation нема претплати ниту податоци што би ги продавала. Конкурентите не се именувани, но веројатно станува збор за Google и за Microsoft, кој неодамна најави наплата според потрошувачката за најнапредните функции на Copilot.
Според фондацијата, LibreOffice 26.8 во првата недела бил симнат над милион пати, рекорд за прва недела, но станува збор само за официјалната страница, без Linux дистрибуциите. Фондацијата наведува и над 4 милиони преземања во септември, но не објаснува како е пресметана бројката.
Фондацијата вели дека ова не е конечно одбивање, бидејќи отворените модели напредуваат многу побрзо од очекуваното, а локалното извршување станува изводливо на стандарден хардвер, па внимателно ќе го оцени секое решение што ги исполнува сите услови.
