Amazon ги претстави Bee Frontier и Bee Eclipse, два нови уреди за „лична вештачка интелигенција“. Тие ги слушаат разговорите на корисникот и од нив прават кратки резимеа, сознанија и предлози за обврски.
Bee е стартап од Сан Франциско што Amazon го купи во јули 2025 година. Нивниот прв уред, нараквицата Bee Pioneer, чинеше 49,99 долари и го слушаше сето она што се зборува околу корисникот, освен ако рачно не се исклучи, за од тоа да прави потсетници и листи со обврски.
Bee Frontier е мал уред што се носи на зглоб или се закачува на облеката. Има два микрофони со филтрирање на шумот и IP67 заштита од вода, а според Amazon батеријата трае до седум дена. Се продава на Amazon.com за 74,99 долари.
Bee Eclipse е тенок уред со големина на кредитна картичка, дебел 4,6 мм, кој магнетно се закачува на задната страна од телефонот. Според Bee, тој ги обработува двете страни од телефонските повици кога корисникот ќе го вклучи, а Amazon наведува батерија од над 21 ден. Ќе чини од 99,99 долари, но не е познато кога ќе почне продажбата.
Резимеата и меморијата од 14 дена се бесплатни, а за останатото е потребна претплатата Bee Pro од 11,99 долари месечно. Таа носи поврзување со Alexa+ и со Amazon.com, кој според Amazon може да предлага производи врз основа на она што корисникот го спомнал во разговорите.
Amazon тврди дека звукот се обработува во реално време и веднаш се брише, а транскриптите се шифрираат со клучеви што ги контролира само уредот на корисникот. Уредите се вклучуваат и исклучуваат со едно копче, а LED светло покажува кога работат.
Вакви производи веќе не се експеримент на мали компании. Apple на почетокот на септември го претстави Apple Watch Series 12 и Watch Ultra 4 со функциите „Audio Intelligence“, меѓу кои Live Rewind, кој ги покажува последните 15 секунди од разговорот како текст и Siri Recap, кој прави резимеа од разговорите. Тие стигнуваат во бета верзија подоцна оваа година, на почетокот само на англиски и не во ЕУ.
Причината изгледа е едноставна: ВИ асистентите се корисни онолку колку што знаат за корисникот, а разговорите се најбогатиот извор на такви податоци. Самиот Amazon вели дека потпирањето на ВИ за паметење на детали за неколку години станало навика.
Проблемот е што во секој разговор учествуваат и луѓе што не го носат уредот. Apple затоа воведува звучен сигнал и анимација на екранот кога работи Live Rewind и не ги препознава говорниците, додека кај Bee Frontier другите можат да се потпрат само на мало LED светло. Кај Eclipse, според Amazon, корисникот при секое снимање на повик добива потсетник да побара дозвола од соговорниците, но не е наведено дали тие добиваат какво било известување.
Шифрирањето и бришењето на звукот го намалуваат ризикот од злоупотреба, но не го решаваат прашањето за согласноста на другите. Кај Amazon дополнително довербата не е голема, па Ring во 2023 склучи спогодба со американската FTC поради обвинувањата дека вработените и надворешните соработници имале неограничен пристап до видеата на корисниците, а минатата година компанијата ја укина можноста гласовните команди за Alexa на неколку Echo уреди да не се праќаат на нејзините сервери.
Не е познато дали Bee ќе стигне надвор од САД, но кога Apple и Amazon се на истата страна, уредите што постојано слушаат веројатно ќе станат дел од секојдневието.
