Покрај VR Glasses, Meta на својата конференција Connect ги претстави Ray-Ban Meta Audio, своите први очила наменети само за звук. Очилата тежат 43 грама и според компанијата се нејзините најлесни и најтенки паметни очила досега.
Наместо на камерата, фокусот е на звукот, кој според Meta е најпопуларната функција уште од првата генерација. Корисникот може да слуша музика и поткасти, да води разговори и гласовно да комуницира со AI асистентот до 12 часа со едно полнење, а кутијата за полнење обезбедува уште до 48 часа.
Според Meta, микрофоните при разговор го пренесуваат гласот појасно од слушалките за во уши. Очилата доаѓаат во два модели, Clubmaster и Burbank, со вкупно 23 комбинации на бои и стакла, а може да се користат и со стакла со диоптрија.
Очилата без камера веројатно се и одговор на критиките за приватноста, кои постојано ги следат паметните очила што можат да снимаат. Meta тоа не го наведува директно, но ова е опција за оние што сакаат паметни очила, а не сакаат уред со камера на лицето.
Истовремено стигнуваат и Ray-Ban Meta (Gen 3), новата генерација на моделот што Meta го нарекува најпродавани паметни очила во светот. Тие се потенки, батеријата трае до девет часа, што е час повеќе од Gen 2, а новото копче овозможува брз пристап до Meta AI.
Според Meta, шесте микрофони отстрануваат над 90% од позадинскиот шум, а камерата од 12 мегапиксели снима видео во 3K резолуција. Како и досега, LED светилка им помага на луѓето околу корисникот да знаат кога очилата снимаат.
Gen 3 се достапни веднаш, со цени што почнуваат од 449 долари, во моделите Aviator, Zena и Wayfarer. Дополнително, од 23 октомври ќе се продава и нова верзија на Meta Adventurer, во црна боја со сиви стакла, која со кутијата за полнење чини 249 долари и е најевтиниот модел од линијата Meta Glasses досега.
Паметните очила на Meta ќе добијат и поврзување со Muse, личниот AI агент на компанијата, кој засега е достапен во САД, а на очилата ќе стигне наскоро.
Meta ја проширува продажбата и на нови пазари, па до крајот на годината Ray-Ban Meta и Oakley Meta ќе стигнат и во Турција, Полска и Португалија. Земјите од Западен Балкан и овој пат не се на листата.
