Meta ги претстави Meta VR Glasses, нов уред за виртуелна реалност во форма на очила. Тежат околу 100 грама, приближно колку шпил карти, а според компанијата можат удобно да се носат со часови.
Ова е возможно поради поделбата на уредот на два дела. Очилата ги содржат сензорите и екраните, а процесорот, батеријата и просторот за складирање се во посебен модул што се поврзува со оптички кабел и се закачува на џеб или торба.
Според Meta, токму поради ова очилата се пет пати полесни од Meta Quest 3, но самиот модул тежи околу 300 грама.
Првите впечатоци се позитивни, а според некои, по пробувањето оценуваат дека ова е уредот што Apple Vision Pro требало да биде.
Страните на очилата се отворени, а камерите ја прикажуваат околината во боја. Тоа значи дека корисникот може да гледа филм во авион и притоа да знае што се случува околу него.
Екранот, кој Meta го нарекува 5K Infinite Display, користи „micro-OLED“ панели со резолуција од 2.412 × 2.288 пиксели по око и 37 пиксели по степен. Според Meta, ова особено се чувствува кај читливоста на текстот. Поддржан е Dolby Vision, а звукот со Dolby Atmos е вграден во рамката.
Уредот работи со процесорот Snapdragon Reality Elite од Qualcomm, а батеријата овозможува до три часа непрекинато гледање видео. Модулот поддржува брзо полнење од 45W и може да се полни додека се користи, па на подолг лет ќе треба приклучок за струја.
Управувањето е без контролери, со глас, поглед и движења на рацете, а Meta AI е вграден директно во оперативниот систем.
Meta посебно ги истакнува содржините. Според компанијата, VR Glasses е прв уред за виртуелна реалност со сертификат IMAX Enhanced, а Disney+ ќе нуди филмови како The Avengers и Black Panther во 3D.
Peacock, HBO Max и Paramount+ за прв пат ги нудат своите 3D каталози, а до почетокот на продажбата Meta најавува илјадници наслови. Дополнително, со режисерот Џејмс Камерон и Lightstorm Vision во 2027 година ќе објават филмови што за прв пат ќе бидат достапни во 3D.
Спортската понуда е насочена кон американски настани. Преку партнерствата со ESPN, MLB, NBC Sports, TNT Sports и UFC, по почетокот на продажбата ќе има над 100 спортски настани во живо годишно.
За работа, очилата нудат еден или повеќе големи виртуелни екрани, а секоја рамна површина може да се користи како тастатура и „touchpad“. На почетокот на продажбата ќе има над 75 игри што се играат само со рацете, а преку Xbox Cloud Gaming се достапни стотици други.
Meta воведува и повици со холограми, во кои фотореалистична дигитална верзија на корисникот ги пренесува неговите изрази во реално време. Функцијата работи со секоја апликација за повици, од WhatsApp до Zoom.
Meta VR Glasses ќе се продаваат од пролетта 2027 година по цена од 1.300 долари. Според Road to VR, очилата ќе бидат достапни во 25 земји, меѓу кои Германија, Франција, Италија и Полска, но ниту една земја од регионот не е на листата. Цената јасно покажува дека ова засега не е уред за масовна публика.
