Discord денес ја објави програмата Nitro Rewards по повод десетгодишнината од лансирањето на Nitro, а во првиот бран членовите добиваат стартна верзија на Xbox Game Pass без дополнителна цена.
Како што објаснува Lu Zhang, виш директор за производите во Discord, целта е Nitro да стане „must-have” членство за секој што игра. Основниот Game Pass пакет што станува вклучен во Nitro нуди библиотека од над 50 компјутерски и игри за конзолите, меѓу кои „Fallout 4“, „Stardew Valley“, „DayZ“, „Deep Rock Galactic“, „Overcooked 2“ и „Grounded“, плус 10 часа „cloud gaming“ за стриминг на повеќе уреди.
Од друга страна, Microsoft потврди дека и претплатниците на Game Pass ќе добиваат Discord Nitro бенефиции, 250 Discord Orbs месечно, 1.2x повеќ Orbs при завршување на Quests, како и автоматски попусти во Discord Shop.
Овој дел од партнерството стартува подоцна овој месец.
Дополнително, Discord ја интегрира библиотеката на Game Pass подлабоко во апликацијата, па кога ќе видите пријател како игра одредена игра, копчето „Play” нуди опција за директно стартување преку Xbox Game Pass.
Покрај Microsoft, во Nitro Rewards се вклучени и попусти на гејминг опрема, до 30% попуст кај Logitech G, 15% кај SteelSeries и 20% кај KontrolFreek, со ротирачки понуди.
Discord и Discord Nitro се официјално достапни во Македонија со полн пристап до сите функции. Кога станува збор за Xbox Game Pass, ситуацијата е поспецифична, па PC Game Pass е официјално достапен во земјава од 2023 година како дел од проширувањето во 40 нови пазари, додека Xbox Game Pass сè уште не е официјално поддржан.
Тоа значи дека македонските Nitro корисници засега не можат да ги користат бенефициите кои се најавени од новата соработка.
