Microsoft почна автоматски да ја вклучува „Memory Integrity“ (интегритет на меморијата, позната и како „HVCI“) на дел од компјутерите со Windows 11. Промената дојде со опционалната надградба KB5127936 од 28 октомври за верзиите 25H2 и 26H2, со која стигнаа и новите контекстуални менија, а сега ја носи и редовната безбедносна надградба од ноември.
Функцијата користи безбедност базирана на виртуелизација („VBS“) за во јадрото на системот да може да работи само доверлив код и доверливи „драјвери“. Microsoft уште на 1 септември најави дека од октомври надградбите ќе ја вклучуваат на компјутерите што ги исполнуваат условите, а каде што е потребно ќе го вклучат и „VBS“.
Според компанијата, Windows пред тоа проверува дали компјутерот е подготвен, па ги зема предвид хардверот, компатибилноста и перформансите. Дополнително, постојните одлуки на корисниците и администраторите остануваат, што значи дека компјутерите на кои „Memory Integrity“ претходно е исклучена нема да бидат променети.
Досега, според документацијата на Microsoft, функцијата автоматски се вклучуваше само при чиста инсталација на Windows 11 на компатибилен хардвер, а не и при надградба. Поради ова, промената веројатно најмногу ќе се почувствува кај компјутерите што на Windows 11 дошле со надградба од Windows 10.
MakeUseOf предупредува на пад на перформансите во игрите и се повикува на тест на Tom’s Hardware од март 2023 година. Таму исклучувањето на целата „VBS“ на компјутер со Core i9-13900K и RTX 4090 донело подобрување до 5% вкупно, само 2% при 4K резолуција и највисоки поставки, а околу 10% кај Microsoft Flight Simulator.
Сепак, тестот е стар повеќе од три години и е направен со постари верзии на Windows и „драјвери“, па не е познато колкава е разликата денес и на послаб хардвер.
Тие што ќе забележат пад во игрите можат да ја исклучат функцијата во „Windows Security“, во делот „Device security“, преку „Core isolation details“ и прекинувачот „Memory integrity“. Тоа ја намалува заштитата од напади врз јадрото на Windows, па ако нема проблеми, подобро е да остане вклучена.
Microsoft за компјутерите на кои не е вклучена автоматски и понатаму нуди рачно вклучување.
