Апликацијата за камерата на iPhone долго време се потпираше на едноставноста, нудејќи универзален пристап за сите корисници. Но, според најновите информации од Марк Гурман, Apple подготвува значителен редизајн со iOS 27, кој ќе им овозможи на професионалните фотографи и напредните корисници да го приспособат интерфејсот според нивните специфични потреби.
Овој чекор претставува отстапување од досегашната филозофија на компанијата, каде што голем дел од напредните опции за фотографирање беа скриени длабоко во менијата, а и таму ги нема нешто посебно многу или бараа користење на софтвер од трети страни.
Главната новина во редизајнираната апликација се очекува да биде воведувањето на модуларен систем базиран на „виџети“. Корисниците ќе имаат можност преку посебно мени на дното од екранот да додаваат, отстрануваат и прераспоредуваат различни контроли, како што се опциите за експозиција, длабочина на полето, тајмер и резолуција.
Овој пристап значи дека секој корисник ќе може да ги постави најчесто користените алатки на дофат на раката, додека оние кои претпочитаат минималистички изглед ќе можат да ја задржат апликацијата во нејзината основна форма.
Дополнително, се очекува копчето за прилагодувањата да биде преместено веднаш до копчето за фотографирање, со цел да се олесни пристапот при користење на телефонот со една рака.
Покрај рачните контроли кои ќе бидат поделени во категории според нивото на сложеност, извештаите најавуваат и интеграција на сосема нов режим поврзан со Siri.
Овој сегмент ќе ги искористи можностите за визуелна интелигенција, овозможувајќи препознавање на објекти и превод на текст директно преку објективот на камерата.
