Американскиот стартап Operation Bluebird неодамна ја пушти социјалната мрежа Twitter.now, со цел да го врати оригиналниот идентитет на некогашната популарна платформа.
Зад овој проект стои Стивен Коутс, поранешен правник за интелектуална сопственост во Twitter. Неговата компанија тврди дека по преземањето од страна на Елон Маск и ребрендирањето во 2023 година, компанијата X целосно ги напуштила правата за користење на името, препознатливото лого со сината птица, како и терминот за кратките објави.
Пуштањето на мрежата се потпира на прелиминарното мислење на федерален судија од април годинава, според кое компанијата X најверојатно се откажала од овие права, иако се уште се чека конечна судска одлука која ќе го расчисти сопствениот статус на брендот.
Самата платформа визуелно и функционално силно потсетува на стариот Twitter, нудејќи им на корисниците добро познати опции за споделување содржини и одговарање на туѓи објави. Со цел да се осигура поголема транспарентност и безбедност во комуникацијата, имплементирана е Vera, автоматизирана алатка за проверка на факти која се базира на вештачката интелигенција Gemini од Google.
Сите конкурентни мрежи на X се „фаќаат“ за проверката на фактите поради упорното тврдење дека тоа е голем проблем на X, иако тоа не е баш точно. Проверката на фактите преку Gemini секако ќе донесе одредена пристрасност, но барем едноставните факти ќе бидат добро проверени.
И покрај амбициозниот почеток пред неколку денови и најавите за независност од компанијата X, сервисот во моментов е недостапен за јавноста. При посета на нивната веб страница се појавува известување кое потврдува дека системот е паднат и дека тимот активно работи на решавање на проблемите.
Во пораката до корисниците, тие признаваат дека веќе ги учат работите на потешкиот начин и ветуваат брзо враќање онлајн. Останува да се види како ќе се одвива техничката стабилизација на новата платформа и каков ќе биде конечниот исход од правната битка што ќе одреди кој субјект смее легално да го користи името Twitter во иднина.
